Ministrja e Drejtësisë, Albulena Haxhiu ka thënë se është shumë e rëndësishme që sa më parë të ketë aktakuzë ndaj Milan Rdoiçiqit dhe terroristëve të tjerë që kryen sulmin në Banjskë.
Haxhiu e pyetur për këtë çështje, nuk dha detaje nëse sot do të ngritet aktakuza nga Prokuroria Speciale, por tha se mirëpresin ngritjen e aktakuzës dhe është shumë e rëndësishme që kjo të ndodhë sa më parë.
“Sa i përket ngritjes së aktakuzës për sulmin terrorist në Banjskë, sulm ky që kishte për qëllim aneksimin e veriut të vendit. Ne në vazhdimësi kemi shprehur shqetësimin se pse nuk po ngritet aktakuzë për kryeterroristin Radoiçiqin. Po ashtu edhe për terroristët tjerë që kanë qenë pjesë e sulmit. Dihet qëllimi që ka pasur Serbia dhe ai grup është financuar nga Serbia, është trajnuar atje. Ne e mirëpresim ngritjen e aktakuzës për Radoiçiqin dhe terroristët tjerë. Më 24 shtator bëhet një vit, prandaj është shumë e rëndësishme që sa më parë të ndodhë kjo. Serbia ka kërkuar po ashtu që provat që i ka Kosova ti dërgojë në Serbi. Ne kemi refuzuar këtë, një përpjekje të dobët të Serbisë që kinse po e heton rastin”, tha Haxhiu në një konferencë për media.
Siç është raportuar gjatë ditës, Pokuroria Speciale pritet të bëjë publike sot aktakuzën për rastin e sulmit terrorist që u bë në Banjskë të Zveçanit më 24 shtator të 2023-ës
Prokuroria Speciale sot ka paralajmëruar konferencë nga ora 12:00, ku konferenca do të mbahet nga vet kryeprokurori Blerim Isufaj.
Kujtojmë se më 24 shtator të vitit të kaluar, një pjesëtar i Policisë së Kosovës mbeti i vrarë kur persona të armatosur, rreth 30 sosh, sulmuan njësitet policore në fshatin Banjskë – zonë e banuar me shumicë serbe në veri të vendit.
Policia e Kosovës pasi mori nën kontroll Manastirin në fshatin Banjskë gjeti një sasi të madhe armatimi dhe mjetesh ushtarake, në mesin e tyre edhe automjete me mbishkrimin KFOR.
Përgjegjësinë për organizimin e grupit të armatosur e pati marrë Milan Radoiçiq, ish-nënkryetar i Listës Serbe, partisë më të madhe të serbëve të Kosovës. Ai u lirua nga Gjykata e Lartë e Serbisë, një ditë pasi u ndalua nën dyshimet se ka kryer një sërë veprash – përfshirë trafikim armësh dhe krime kundër sigurisë së përgjithshme.
Radoiçiq, ndodhet tashmë në sistemin e organizatës më të madhe ndërkombëtare të policisë, INTERPOL për urdhërarrest.
© SYRI.net
Arrest shtëpiak për ish-pjesëtarin e ISIS-it, kishte përgatitur sulme terroriste në Kosovë dhe Ballkan
Raportohet për një zjarr në Suhodoll, rrezikohen disa shtëpi
Takimi në Bruksel, Bislimi: Serbia qëllimshëm po e zvarrit çështjen e personave të zhdukur me dhunë
Denonco
Merrni lajmet më të fundit nga SYRI.net në çdo moment dhe kudo që të jeni!
