Ministri Sveçla: Kosova i ka përgatitjet e duhura për t’iu përgjigjur agresionit të mundshëm serb

10:36, 17/07/2024

Ministri i Punëve të Brendshme, Xhelal Sveçla është deklaruar se institucionet e sigurisë kanë prova të mjaftueshme sa për të konfirmuar se presidenti i Serbisë, Aleksandër Vuçiq, ka qenë drejtpërdrejtë i përfshirë në trajnimin e grupit terrorist që kreu sulmin në Banjskë të Zveçanit me 24 shtator të 2023, ku u vra rreshteri i Policisë, Afrim Bunjaku.

Sveçla këto i tha në një intervistë për Euronews Albania, ku tha se Kosova i ka të gjithë skenarët dhe përgatitjet e duhura për t’iu përgjigjur agresionit të mundshëm serb.

“Kishim fatin të mblidhnim shumë dëshmi lidhur me grupin terrorist. Tani e dimë se para sulmit në Banjskë, ky grup është trajnuar në një poligon zyrtar ushtarak të Serbisë. Së fundi, Vuçiq vizitoi këtë poligon, ku ushtria e rregullt serbe pati një trajnim ushtarak. Kemi incizimet, kemi pranim dorëzimet e armatimit nga magazinat e ushtrisë për këtë grup terrorist”, deklaroi Sveçla.

Ai tha gjithashtu se gjatë qeverisjes së kryeministrit Albin Kurti, është punuar që situata në Veri të Kosovës t’i kthehet normalitetit.

“Kemi informata inteligjente, dëshmi gojore, që tregojnë se Vuçiq ishte drejtpërdrejtë i përfshirë në trajnimin e këtij grupi. Kemi të gjitha dëshmitë. Është tjetër nëse dëshirojmë t’i injorojmë apo minimizojmë. Ne për këto arsye kemi pasur edhe takime të Këshillit të Sigurisë. Ne kemi skenarët, përgatitjet dhe mobilizimin e kapaciteteve tona për t’iu përgjigjur çdo lloj agresioni të grupeve terroriste të financuara nga Serbia”, vijoi ai.

“Ne po punojmë që 17 % e territorit të Kosovës t’i kthehet normalitetit. Të gjithë e dimë se për 22-23 vite situata në veri të Kosovës, në 4 komunat veriore nuk ka qenë normale. Ka qenë një agresion i hapur i Serbisë përmes instrumenteve të saj, që është shpërfaqur herë shumë agresive, duke shtypur popullin shqiptar atje, si në vitin 2000 kur u shpërngulën nga Mitrovica e Veriut 11 mijë shqiptarë e u vranë 11 persona”, tha Sveçla.

© SYRI.net

Lexo edhe:

• Hill: ShBA-ja s’i ka miratuar e as koordinuar veprimet e fundit të Kosovës në veri
• Kurti takohet me nobelisten Murad, flasin për mbështetje për gratë e dhunuara gjatë luftës
• Rrahje mes disa personave në Emshir, lëndohen tre e arrestohen gjashtë