Gjenerali amerikan Christopher Cavoli mori postin e Komandantit Suprem të Forcave Aleate të NATO-s për Evropën në Mons, Belgjikë, nga gjenerali Todd Walters i Forcave Ajrore Amerikane, i cili ishte në atë pozicion që nga viti 2019, njoftoi shërbimi për shtyp i NATO-s.
Në dorëzim të detyrës mori pjesë Sekretari i Përgjithshëm i NATO-s, Jens Stoltenberg, i cili i dha gjeneralit Walters Medaljen e Shërbimit të Merituar të NATO-s, ndërsa i uroi mirëseardhjen Gjeneralit Cavoli, me mesazhin se ai po merr detyrën në një moment "pikë kthese për transatlantin".
"Kjo pikë kthese u shënua nga konkurrenca strategjike në rritje dhe kthimi i konfliktit brutal në Evropë," i tha Stoltenberg Cavoli-t, duke shtuar se ai ishte i bindur se do të vazhdojë t'i shërbejë NATO-s me të njëjtin përkushtim që ka treguar gjithmonë.
Duke folur për karrierën ushtarake tridhjetë e pesë vjeçare të Cavoli-t, ai kujtoi se ajo përfshiu të gjithë botën, nga Bosnja dhe Hercegovina në Irak, Afganistan dhe Uashington.
"Kohët e fundit, si komandant i forcave amerikane në Evropë dhe Afrikë, ju keni mbikëqyrur rritjen më të madhe të pranisë së SHBA në Evropë në dekada, me më shumë se 100,000 trupa," tha Stoltenberg.
Komanda e Operacioneve Aleate është përgjegjëse për planifikimin dhe ekzekutimin e të gjitha operacioneve të NATO-s.
Gjenerali Cavoli është Komandanti i 20-të Suprem i Aleatëve në Evropë (SACEUR). I pari që mbajti atë detyrë ishte gjenerali Dwight D.
Eisenhower, më vonë Presidenti i 34-të i SHBA-së.
© SYRI.net