Arrestohet djali i kryetarit të Junikut, dyshohet për dallavere me vota

10:31, 31/10/2021

Drejtoria e Krimeve të Rënda në aksionin e djeshëm në komunën e Junikut në kërkim të provave dhe të dyshuarve të tjerë që lidhen me rastin e dokumentacionit zgjedhor që dyshohet se u falsifikua në këtë komunë, ka arrestuar djalin e kryetarit të kësaj komune, Flamur Kuçi.

Mësohet se i njëjti dyshohet se në bashkëkryerje me zyrtaren e komunës së Junikut, Blerina Sallaj dhe aktivistë të tjerë të AAK-së kanë përgatitur materialin e sekuestruar nga Policia, që kishte destinacion diasporën.

Të njëjtit me vendim të prokurorit i është caktuar masa e ndalimit prej 48 orësh.

Ndërkaq, Blerina Sallaj është ndaluar për 48 orë nga prokuroria dyshohet për veprën penale “dhënie ose marrje e ryshfetit në lidhje me votimet”.

Blerina Sallaj është mbrojtur në heshtje gjatë intervistimit nga Drejtoria e Krimeve të Rënda.

Megjithatë, ajo gojarisht ua ka rrëfyer të vërtetën Policisë që në kontaktin e parë në aeroport, kur u zu në flagrancë me materialet e sekuestruara.

Çka gjeti Policia në valixhen e Blerina Sallajt në Aeroportin e Prishtinës?

Sallaj të premten ishte nisur për në Gjermani, me ç’rast Policia e Kosovës kishte gjetur në bagazhin e saj me qindra dokumente të votuesve të diasporës në komunën e Junikut të përgatitura paraprakisht, në mënyrë të organizuar në emër të votuesve të Junikut nga diaspora. Me këtë rast Policia ka sekuestruar telefonin e saj dhe një laptop me fletëvotime të diasporës dhe listën e votuesve në Junik për kryetar të komunës së Junikut në zgjedhjet e 14 nëntorit.

Dosja që dyshohet të jetë e falsifikuar përmban kopje të letërnjoftimeve, lista me emra të 200 personave, të përgatitura për votim nga diaspora.

Lexo edhe: LDK në Junik reagon ashpër për dyshimet për dallavere me vota

Sallaj gjatë intervistimit,  ka deklaruar se këtë material ka pasur të ia dërgojë vëllait të kryetarit të komunës së Junikut, Agron Kuçit.

Blerina Sallaj është një nga bashkëpunëtoret më të ngushta të Agron Kuçit, i cili është kandidat nga AAK për kryetar të Junikut. Dyshohet se e arrestuara në bashkëkryerje edhe me persona të tjerë, ka tentuar që të dërgojë në mënyrë të organizuar votat nga diaspora në mbështetje të kandidatit Agron Kuçi.

 

© SYRI.net

Lexo edhe:

• Ish-diplomati serb: Kosova histori e mbyllur, Vuçiçi po e dorëzon
• Kurti pas drekës me von der Leyen dhe liderët e rajonit: Presim marrjen e statusit të kandidatit dhe pyetësorit
• ​Ambasada britanike nis fushatën për përfshirjen e barabartë të grave në jetën publike