Vijon pa asnjë sinjal zbutje, përballja e ashpër mes Izraelit dhe militantëve palestinezë të Hamasit. Ushtria Izraelite bombardoi sërish Rripin e Gazës në orët e para të së martës, duke rrëzuar dy ndërtesa të tjera. U shkatërrua gjithashtu një segment prej 15 km të një tuneli të Hamasit, ndërsa të hënën u dëmtuan rrugë, banesa dhe linja elektrike.
Ushtria Izraelite thotë se dhjetëra raketa u lëshuan nga territori i Gazës mbrëmjen e së hënës. Të paktën 212 persona, përfshirë 61 fëmijë kanë humbur jetën në Gaza, ndërsa Izraeli numëron 10 viktima mes të cilëve 2 fëmijë. Tel Avivi pretendon se shumica e viktimave në Gaza janë militantë dhe se viktimat civile janë të paqëllimshme.
“Disa prej viktimave ishin ende të gjallë kur mbërritën në spital, pasi kishin qenë të bllokuar për 10 orë në rrënoja. Do të kishim shpëtuar më shumë jetë nëse do të kishim më shumë resurse për kërkim-shpëtimin”, u shpreh Muhammad Abu Salmiya, mjek në Gaza.
Presidenti amerikan, Joe Biden, shprehu mbështetjen për një armëpushim, pas 8 ditësh luftime të përgjakshme. Biden, mësohet t’i ketë thënë kryeministrit Benjamin Netanjahu se Shtetet e Bashkuara po punojnë me Egjiptin dhe vende të tjera për t’i dhënë fund luftimeve, edhe pse SHBA-ja bllokoi një rezolutë të Këshillit të Sigurimit që kërkonte ndaljen e dhunës.
“Qëllimi ynë, në çdo veprim që ndërmarrim apo deklaratë që bëjmë, është të reduktojmë dhunën dhe t’i japim fund konfliktit. Por ka momente në diplomaci kur bisedimet zhvillohen pas kuintave ”, u shpreh Jen Psaki, zëdhënëse e Shtëpisë së Bardhë.
Liderë botërore dhe organizata humanitare kanë kërkuar marrjen e masave për të parandaluar vdekjen e civilëve dhe shkatërrimin e banesave. Edhe OKB-ja shprehu shqetësimet për dëmtimin e infrastrukturës në Gazën e varfër, ku jetojnë 2 milionë njerëz. 40 shkolla dhe 4 spitale janë shkatërruar plotësisht ose pjesërisht.
© SYRI.net
Po sikur Trump-i të fitojë?
'Kërkoni falje për mëkatet tuaja, ose…'/ Polonia kërcënon Ukrainën, tronditje në Kiev 
Izraeli e pranon: Kemi nisur valë të re sulmesh ndaj Hezbollahut
Denonco
Merrni lajmet më të fundit nga SYRI.net në çdo moment dhe kudo që të jeni!
