The Washington Post ka raportuar se presidenti amerikan Joe Biden ka miratuar shitjen e armëve në vlerë të 735 milionë dollarëve për Izraelin.
Kjo vjen mu në kohën e konfliktit të tmerrshëm që po ndodh në Izrael dhe Gazë mes hebrenjve dhe palestinezëve, shkruan periskopi.
E përditshmja e famshme raportoi se miratimi është bërë më 5 maj, para eskalimit të situatës në Gaza. Megjithatë, vendimi u mor në kohën kur pati shumë kritika për dëbimin e planifikuar të palestinezëve nga një lagje e Jerusalemit Lindor dhe bastisjeve në xhaminë Al-Aqsa.
Agjencia Reuters raportoi se Kongresi është informuar në prill për shitjen e planifikuar të këtyre armëve, si pjesë e një procesi joformal të rishikimit, para njoftimit zyrtar më 5 maj. Sipas ligjit amerikan, njoftimi zyrtar hap afatin prej 15 ditësh brenda të cilit Kongresi mund të paraqesë ankesë, por një gjë e tillë nuk pritet të ndodhë, pavarësisht dhunës së vazhdueshme mes izraelitëve dhe palestinezëve.
Vendimi për t’ia dhënë dritën e gjelbër shitjes së armëve Izraelit ka nxitur kundërshtime nga disa anëtarë të Partisë Demokratike, pjesë e së cilës është presidenti amerikan. Këtë vendim e kundërshtoi kongresistja Ilhan Omar, e cila kërkoi që shitja e armëve të mos ndodhë.
“Nëse ky proces vazhdon, ai do të shihet si dritë e gjelbër për vazhdimin e eskalimit dhe do t’i dëmtojë përpjekjet për arritjen e një armëpushimi”, tha kongresistja amerikane.
Sipas Ministrisë së Shëndetësisë në Palestinë, së paku 212 palestinezë janë vrarë që nga fillimi i sulmeve izraelite në Gaza javën e kaluar. Në mesin e viktimave janë 61 fëmijë. Në anën tjetër, në Izrael deri më tani janë vrarë 10 persona nga raketat palestineze.
© SYRI.net
Po sikur Trump-i të fitojë?
'Kërkoni falje për mëkatet tuaja, ose…'/ Polonia kërcënon Ukrainën, tronditje në Kiev 
Izraeli e pranon: Kemi nisur valë të re sulmesh ndaj Hezbollahut
Denonco
Merrni lajmet më të fundit nga SYRI.net në çdo moment dhe kudo që të jeni!
