Wojciech Szczesny tani është portier i Barcelonës pasi nënshkroi një kontratë këtë të mërkurë deri më 30 qershor 2025 për të mbushur boshllëkun e lënë nga Marc ter Stegen.

Polaku, i cili kishte njoftuar tërheqjen dhe nuk ka luajtur që nga Evropiani i fundit, pranoi të rivishte dorezat. Në deklaratat e tij të para për mediet e klubit të Barçës, portieri 34-vjeçar shpjegoi se si e mori vendimin dhe zbuloi se Robert Lewandowski ishte çelësi për ta bindur.

"Është një moment krenarie maksimale. Sinqerisht, isha përgatitur për pension. Isha i lumtur në atë situatë, por të qenët këtu, ditët e para në qytet dhe duke parë sesi njerëzit më kanë trajtuar dhe sa e rëndësishme është për ta, më ka bërë të ndihem krenar si pjesë e kësaj familjeje emocionuese. Megjithëse është një institucion i madh dhe një klub i madh futbolli, kjo ndjenja e familjes, që është shumë e rëndësishme për mua, më bën të lumtur”.

Lidhur me rolin e bashkatdhetarit të tij Lewandowski në nënshkrimin e tij për Barçën, Szczesny ishte shumë i qartë:

"Ai ishte personi i parë që më thirri për të parë mundësinë që kjo të ndodhte sepse isha në pension. Në fillim nuk isha i përgatitur për sfida të reja, por kam biseduar me familjen dhe miqtë e mi dhe të gjithë më thanë se do të ishte gabim të mos e pranoja këtë, prandaj Roberti luajti një rol shumë të rëndësishëm, sepse ai ishte personi që kishte idenë të më bindte”.