Në Hungari është zhvilluar edicioni i 7-të i Lojërave Universitare Europiane, event i mbajtur më datat 12-24 korrik në qytet Debrecen dhe Miskolc.

Kjo ishte ngjarja më e madhe sportive universitare e organizuar në Europë me mbi 4,500 atletë, nga 414 universitete dhe 36 vende që garuan në 17 sporte të ndryshme, dhe mbi 800 vullnetarë që kontribuuan në organizimin e suksesshëm të ngjarjes.

Delegacioni shqiptar i përbërë nga 50 studentë nga universitete publike dhe private garuan në: futboll, taekuondo, volejboll plazhi, pingpong dhe tenis.

Studentët e Universitetit “Fan S. Noli” të Korçës shkëlqyen në turneun e meshkujve në “Taekwondo Kyorugi”, duke fituar dy medalje.

Tedi Likomeni fitoi medalje argjendi, për ta ngjitur flamurin shqiptar në shkallën e dytë të podiumit. Likomeni spikati me paraqitjet e tij gjatë garave teksa mposhti dy kundërshtarët nga Portugalia dhe me vetëm një humbje përball rivalit nga Kroacia, u rendit i dyti.

Ndërsa Gledis Buba ia doli të fitonte medalje bronzi. Ai triumfoi ndaj kundërshtarëve nga Gjermania dhe Anglia, ndërsa u mposht në sfidën me kundërshtarin nga Portugalia, për t’u renditur në vend të tretë.Ngjitja e studentëve kuqezi në podiumin e fituesve për të marrë medaljet respektive ishte një moment krenarie dhe emocioni, teksa sportistët shqiptarë treguan profesionalizëm dhe talent në Lojërat Universitare Europiane.