Tirana ka pësuar humbjen e parë të këtij sezoni në Superiore, teksa është mundur në ndeshjen hapëse të javës së pestë nga Erzeni me shifrat 1-0.

Ndërsa të gjithë pritnin një dominim të bardhebluve kryetytetas, këta të fundit janë shfaqur rrallëherë rrezikshëm para portës mike dhe shijakasit kanë treguar se mund të përballonin ofensivën e ekipit të Shehit. Ata goditën më pas në kundërsulm me Maliqin dhe më pas u fokusuan më shumë që të mbronin rezultatin.

Reagimi i Tiranës ishte shumë i vakët, pa vënë në rrezik shpesh portierin Hysenbelli, ndërsa Lika u detyrua nga ana tjetër të bënte mrekulli për të shpëtuar katërkëndorin e tij nga goli i dytë, duke mbajtur në lojë deri në fund skuadrën. Megjithatë, sulmi bardheblu ishte në ditë “jo” e kështu, Erzeni u largua me tre pikë nga “Selman Stërmasi”, duke u shfaqur befasisht si një pretendent për zonën e rëndësishme të tabelës, atë që të çon në luftën për titull.