“Faraonët” në gjysmëfinale të Kupës së Kombeve të Afrikës. Mohamed Salah me shokë vuajtën jo pak përballë Marokut, të cilin e mposhtën pas 120 minutave lojë, teksa koha e rregullt u mbyll 1-1.

Sulmuesi i Liverpoolit ishte vendimtar në këtë sukses të Egjiptit pasi shënoi një gol dhe dha asistin e finalizimit të fitores në shtesë.

Në fakt, pjesa e parë u mbyll me epërsinë e Marokut, falë golit të Boufal që në minutën e 7-të me 11-metërsh.

Sigurisht, kur ke në përbërje një sulmues si Salah, gjithçka bëhet më e lehtë.

Sulmues i “The Reds” barazoi takimin në minutën e 53-të, por deri në vërshëllimën e kryesorit për përfundimin e lojës së rregullt nuk pati ndryshim tjetër rezultati.

Pa u mbyllur 100 minuta lojë, Trezeguet shënoi golin e dytë dhe të fitores për Egjiptin, që në gjysmëfinale do të përballet me Kamerunin organizator të turneut.