Të 20 klubet e Premier Ligës kanë diskutuar procesin e reformës së Kalendarit Ndërkombëtar të Ndeshjeve pas vitit 2024 dhe janë njëzëri kundër propozimit të FIFA-s për mbajtjen e Kupës së Botës çdo dy vjet për meshkuj, së bashku me çdo plan që përfshin zgjatjen e konsiderueshme të dritareve ndërkombëtare.

Klubet ngritën shqetësime për ndikimet negative që propozimet aktuale të FIFA-s do të kishin në mirëqenien e lojtarëve, përvojën e tifozëve, përgatitjet para sezonale dhe cilësinë e garave.

Richard Masters, shefi ekzekutiv i ‘Premier League’, tha: “Premier League është e përkushtuar të parandalojë çdo ndryshim rrënjësor në kalendarin ndërkombëtar të ndeshjeve të FIFA-s pas 2024 që do të ndikonte negativisht në mirëqenien e lojtarëve dhe do të kërcënonte konkurrencën, kalendarin, strukturat dhe traditat e futbollit vendas.

“Ne jemi të hapur ndaj reformave dhe ideve të reja, por ato duhet të rrisin ekuilibrin plotësues mes futbollit vendas dhe atij ndërkombëtar për të përmirësuar lojën në të gjitha nivelet.

“Ky proces duhet të përfshijë gjithashtu marrëveshje domethënëse me ligat që ofrojnë themelet për lojën.

“Ne do të vazhdojmë të punojmë me grupet mbështetëse, lojtarët, palët e interesuara vendase dhe ndërkombëtare për të gjetur zgjidhje që janë në interesin më të mirë të të ardhmes afatgjatë të futbollit”, thuhet në komunikatën zyrtare të faqes së Premier Ligës.

Premier League është duke pritur Mbledhjen e Përgjithshme Vjetore të Forumit të Ligave Botërore në Londër më 2 dhe 3 dhjetor.