Edhe pse Italia vendosi rekordin absolut të 36 ndeshjeve pa humbje, Roberto Mancini ka nisur të reflektojë për një sërë çështjesh shqetësuese, të cilat nuk po marrin përgjigjen e duhur në fushën e lojës.

Sulmi është pika kryesore ku trajneri është fokusuar, sepse është e vërtetë që Italia është rikthyer të ëndërrojë e të luajë një futboll të bukur argëtues, por vlen gjithashtu të theksohet se “të kaltrit” nuk fitojnë një ndeshje brenda 90 minutave që prej 2 korrikut ndaj Belgjikës në çerekfinalet e Europianit.

Më pas katër barazime radhazi, që nuk e penguan Italinë të ngrejë lart trofeun e kampionit të Europës, por vetëm falë saktësisë te pika e penalltisë.

Mbi të gjitha, kampionëve të Europës u mungojnë golat, pasi kanë shënuar vetëm tre herë në katër ndeshjet e fundit dhe përveç Chiesës, që ka dërguar dy herë topin në rrjetë, pjesa tjetër kanë stonuar.

Sytë e kritikës drejtohen kryesisht nga Ciro Immobile, që te Lazio vijon të shkëlqejë e të shënojë rregullisht, por shndërrohet totalisht sapo heq bluzën bardhekaltër dhe vesh atë të përfaqësueses italiane.

Sulmuesi nuk shënon që prej 16 qershorit, ndaj Zvicrës në fazën e grupeve të Europianit, ndërsa alternativa ndaj tij, Belotti po vuan dëmtime të shpeshta dhe të tjerë si Raspadori, Kean e Scamacca nuk janë ende gati të udhëheqin ekipin me golat e tyre.