Komisioni Evropian do të ndihmojë Maqedoninë e Veriut dhe Bullgarinë në luftën ndaj zjarreve pyjore, ka thënë të martën zëdhënësi i Komisionit Evropian, Balazs Ujvari.
Ai ka thënë se katër helikopterë dhe tre aeroplanë për luftim të zjarreve janë dërguar në Maqedoninë e Veriut, e cila është në gjendje krize që prej 30 ditëvë.
Ujvari ka thënë se dy helikopterë për luftim zjarresh do të dërgohen nga Republika Çeke për në Bullgari.
Në Maqedoninë e Veriut është në fuqi një ndalesë e plotë në lëvizjet në pyje, për shkak të rrezikut nga zjarret, të cilat kërcënojnë qindra hektarë tokë.
Zëvendëskryeministri i Serbisë, Ivica Daçiç, ka thënë se helikopterët e ofruar prej Beogradit synojnë vetëm shuarjen e zjarreve dhe nuk janë shenjë e dominimit ushtarak.
Përveç Maqedonisë së Veriut dhe Bullgarisë, dhe Shqipëria është duke u përballur me zjarre në disa zona.
Të ndihmuara nga erërat dhe temperaturat e larta, zjarret po përhapen me lehtësi duke rrezikuar disa vendbanime.
Ditëve të fundit, i gjithë rajoni i Ballkanit po përballet me temperatura tejet të larta – deri në 40 gradë./ REL
© SYRI.net