Athinë - Grupi i tretë më i madh i Greqisë në parlament të dielën zgjodhi një ligjvënës të Parlamentit Evropian si udhëheqësin e tij të ri. Nikos Androulakis mundi ish-kryeministrin Jorgo Papandreu për të udhëhequr Lëvizjen për Ndryshim, një koalicion socialist.

Rezultatet e pjesshme pak para orës 21:00 e treguan 42-vjeçarin Androulakis me 68.4% të votave krahasuar me 31.6% për 69-vjeçarin Papandreu. Papandreu e telefonoi rivalin e tij për ta uruar.

Androulakis, një inxhinier ndërtimi, e filloi karrierën e tij politike si drejtues i krahut rinor të Lëvizjes Socialiste Panhelene ose PASOK, një nga partitë në Lëvizjen për Ndryshim.

Me 22 ligjvënës në parlamentin grek prej 300 anëtarësh, Lëvizja për Ndryshim është grupimi i tretë më i madh politik i Greqisë pas Demokracisë së Re në pushtet dhe SYRIZA-s së krahut të majtë. Ajo fitoi 8.1% të votave në zgjedhjet e fundit kombëtare të Greqisë, në korrik 2019.

PASOK-u socialist drejtoi Greqinë nga 1981-89, 1993-2004, 2009-11 dhe 2011-15 – katër vitet e fundit në koalicion me Demokracinë e Re.