Ka vazhduar edhe sot tensioni verbal midis Athinës dhe Ankarasë, për shkak të situatës në detin Egje, por edhe zonat ekskluzive ekonomike në Mesdhe.

Ministria e Jashtme greke ka nxjerrë një tjetër deklaratë të ashpër të enjten në mesditë, në përgjigje të deklaratave që kishte bërë disa orë më parë ministri i mbrojtjes i Turqisë.

“Delimitimi i zonës ekskluzive ekonomike greke në tërësi, do të bëhet në bazë të së drejtës ndërkombëtare dhe sigurisht jo duke marrë në konsideratë teoritë e pabazuara dhe arbitrare të Turqisë që është një shkelëse e të drejtës ndërkombëtare”, thuhet në deklaratën e ministrisë së jashtme greke, shkruan ora news.

Më herët, ministri i mbrojtjes i Turqisë, Hulusi Akar, kishte deklaruar rreth njoftimit se Athina do të shtrijë në 12 milje ujërat territoriale: “Turqia do të marrë masat e domosdoshme nëse merren vendime në kundërshtim me interesat turke në detin Egje”.

“Jemi në favor të zgjidhjes së problemeve nëpërmjet paqes dhe negociatave, pa i shndërruar ato në konflikte të ngushta në çfarëdo mënyre”, i deklaroi Akar agjencisë se lajmeve Anadolu Ajans.

Pikërisht kjo fjali është interpretuar nga Athina si një kërcënim, si një revokim i vendimit të parlamentit turk në 1995, se zgjerimi i ujërave territoriale të Greqisë në detin Egje, do të jetë një casus belli – kauzë për luftë.

“Greqia nuk ka për të rrëshqitur në një manifestim retorike agresive”, theksohet në deklaratën e ministrisë së jashtme greke.