Argita Malltezi, vajza e ish-kryeministrit Sali Berisha ishte e ftuar në “Off the Records” me Andrea Dangllin, ku foli edhe rreth mundësisë për të kandiduar si deputete në zgjedhjet e ardhshme parlamentare.

Teksa tregoi se ende nuk ka vendimmarrje prej saj për këtë çështje, vajza e ish-kryeministrit u shpreh se nëse do të kandidonte do të ishte pjesë e listave të hapura.

Më tej Malltezi theksoi se nuk mund të ketë zgjedhje me Edi Ramën, teksa e konsideroi si hap të rëndësishëm që kritikët e parë ndaj babait të saj, sot janë ndjekësit e tij të parë.

“Këtu nuk është një situatë normale. Nuk bëhet fjalë nëse PD do t’i fitojë zgjedhje apo jo. Çështja është a duhet të ngrihen strukturat e PD për t’i qëndruar këtij narkoshteti. Nuk mund të ketë zgjedhje me Edi Ramën. Opozita duhet të ngrihet dhe të bëjë qëndresë. Nuk duhet hequr dorë nga thirrja e njerëzve për të reaguar ndaj të keqes. PD jep shembullin e veprimit, por njerëzit duhet të ngrihen për veten e tyre. Kritikët e parë të Berishës sot janë ndjekësit e parë, ky është një hap i rëndësishëm. PD respekton diversitetin. Nuk kam marrë një vendim nëse do të kandidoj. Nëse zgjedhjet do mbaheshin sot nuk do të kandidoja. Nëse do garoja do të isha pjesë e listës së hapur.”, tha Malltezi.