Komisioni Hetimor për koncesionin e check up dhe sterilizimin rinisi këtë të mërkurë punën, pas vendimit të Kuvendit për zgjatjen e afatit të hetimit deri në fund të muajit tetor.

Mazhoranca dhe opozita në këtë mbledhje të parë në sesionin e ri parlamentar kishin ardhur me një qasje tjetër duke arritur dakordësi për listën e dëshmitarëve që do thirren në komision për t’u pyetur për dy koncesionet në shëndetësi.

Pa asnjë votë kundër u miratua lista e dëshmitarëve, të cilët do pyetet gjatë javës së ardhshme. Që nga ish-drejtorët e QSUT, drejtuesja aktuale dhe drejtuesit dhe ish-drejtuesit e spitaleve rajonale do të merren në pyetje nga anëtarët e komisionit.

Përveç konsensusit në këtë pikë të rendit të ditës, si nga mazhoranca dhe opozita u kërkua që dhe raporti përfundimtar të jetë i unifikuar pasi sipas tyre qytetarët kanë nevojë të dinë se ku kanë shkuar qindra miliona Euro dhe çfarë shërbimesh janë kryer nga koncesionarët.