Kryeministri Edi Rama njoftoi shqiptarët se ka nisur pushimet në Dhërmi.

Prej andej, ai sulmoi mediat dhe opozitën, të cilët kanë denoncuar dështimin e këtij sezoni turistik.

Përballë pamjeve të shumta të plazheve bosh, Rama publikoi disa shifra, pa cituar se cili ishte burimi i tyre.

Sërish ai u bazua te të dhënat e aeroportit, pa treguar të dhënat për hotelet dhe shtëpitë e pushimit në vend.

Po ashtu nuk dha asnjë të dhënë ekonomike për situatën nga turizmi.

“Mbrëmë mora shifrat, nga aeroporti kanë hyrë 1 milionë e 200 mijë pasagjerë, mbi 350 mijë më shumë se vjet. Këtë korrik është thyer edhe një rekord tjetër, ai i hyrjeve në një ditë të vetme, 44 mijë. Aeroporti ka arritur të operojë deri në 252 fluturime në ciklin e 24 orëve, e paimagjinueshme pak vite më parë. Për shifrat e aeroportit s’mund të thonë as gojët me qime të atyre që nuk pushojnë, u zbraz Shqipëria tani edhe nga turistët. Në vlerë absolute për numër pasagjerësh, Tirana e ka spostuar në vendin e dytë aeroportin e Beogradit,” tha Rama.