Sot në mbledhjen e qeverisë është vendosur që gjatë këtij sezoni turistik punonjësit e policisë me urdhër të kreut të Policisë së Shtetit, Muhamet Rrumbullaku, do të punojnë me orë të zgjatura.

Për të dytin vit radhazi punonjësve të policisë u hiqet arbitrarisht e drejta për pushime gjatë sezonit veror, duke u zhvendosur ato në dimër.

Në vendimin e sotë të qeverisë thuhet se punonjësve të policisë do t’u zgjaten orët e shërbimit me 4 orë për çdo turn për periudhën nga data 16 qershor deri në datën 15 shtator.

Për këtë shërbim punonjësit do të kompensohen me pagë dhe pagesa kryhet bashkë me pagën mujore të muajit kur është kryer shërbimi.

Këto shtesa vijnë pas vendimit të anulimit të pushimeve verore për efektivët e policisë.

"V E N D I M PËR DISA SHTESA NË VENDIMIN NR.101, DATË 15.2.2017  TË KËSHILLIT TË MINISTRAVE, 'PËR KOHËN E PUNËS DHE TË PUSHIMIT NË POLICINË E SHTETIT'

Në mbështetje të nenit 100 të Kushtetutës, të nenit 63, të ligjit nr.108/2014, 'Për Policinë e Shtetit', të ndryshuar, dhe të neneve 76-108, të ligjit nr.7961, datë 12.7.1995, 'Kodi i Punës i Republikës së Shqipërisë', të ndryshuar, me propozimin e ministrit të Brendshëm, Këshilli i Ministrave

V E N D O S I:

1. Në kreun I, të vendimit nr.101, datë 15.2.2017, të Këshillit të Ministrave, 'Për kohën e punës dhe pushimit në Policinë e Shtetit', bëhen këto shtesa:

a) Pas pikës 12 shtohen pikat 12/1 e 12/2,  me këtë përmbajtje:

'12/1. Aktivizimi i punonjësve të policisë në punë/shërbim me zgjatje të kohës normale të punës/shërbimit, 4 (katër) orë për çdo turn/shërbim, bëhet me urdhër të drejtorit të Përgjithshëm të Policisë së Shtetit dhe realizohet gjatë sezonit turistik veror, për periudhën nga data 16 qershor deri në datën 15 shtator.

12/2. Zgjatja e kohës normale të punës/shërbimit, 4 (katër) orë për çdo turn/shërbim, gjatë sezonit turistik veror, për periudhën nga  data 16 qershor deri në datën 15 shtator, kompensohet me pagë dhe pagesa kryhet bashkë me pagën mujore të muajit kur është kryer shërbimi'.

b) Në pikën 13, pas fjalëve '… mbi kohën normale të punës…' shtohen               '… dhe zgjatjes së kohës normale të punës/shërbimit…'

2. Efektet financiare, që rrjedhin nga zbatimi i këtij vendimi, përballohen nga buxheti i shtetit për programin buxhetor 'Policia e Shtetit'.

3. Ngarkohen Ministria e Brendshme dhe Policia e Shtetit për zbatimin e këtij vendimi.

Ky vendim hyn në fuqi pas botimit në 'Fletoren zyrtare'”, thuhet në njoftim.