Kryeministri Edi Rama foli sërish mbi palët, duke iu referuar situatës mes Kosovës dhe Serbisë.

Sikur të mos ishte kryeministri i shqiptarëve, Rama bëri një postim asnjanës për seancën e djeshme në Këshillin e Sigurimit të OKB.

Ai nuk tha asnjë fjalë për mikun e tij, Aleksandër Vuçiç, që e kërkoi këtë seancë.

Po ashtu nuk kritikoi fare qasjen destruktive të Serbisë dhe Beogradit, por kërkoi që Kosova të koordinohet me aleatët.

“Ishte një seancë pa kuptim. Këshilli i Sigurimit i OKB-së është e qartë se nuk është vendi për asgjë që lidhet me Kosovën.

Si dy vende sovrane që aspirojnë anëtarësimin në BE, Kosova dhe Serbia duhet të përqendrohen plotësisht në dialogun e lehtësuar nga BE-ja dhe të fokusohen në arritjen e marrëveshjeve për qarkullimin financiar, shërbimin postar, taksimin e dyfishtë dhe të gjitha çështjet e tjera që përfitojnë jetën e përditshme të njerëzve të zakonshëm, duke siguruar edhe një të ardhme paqësore për brezat e ardhshëm.

Ndërsa qëndrojmë pranë Kosovës në parandalimin e çdo kërcënimi të jashtëm, Shqipëria do të vazhdojë t’i theksojë lidershipit kosovar rëndësinë e koordinimit të ngushtë me aleatët e saj kryesorë.

Qëndrimi i palëkundur dhe i vazhdueshëm së bashku me ta tregon ndjenjën e vizionit dhe përgjegjësisë shtetërore, ndërkohë që çdo rast i qëndrimit të vetëm në rrugën e njohjes së plotë e zbeh pozitën e vendit në sferën publike të marrëdhënieve ndërkombëtare”, tha Rama.