Boldnews.al

Hetimet penale dhe administrative për ryshfetin “sa gjysma e vlerës së tenderit” në Ministrinë e Shëndetësisë ka qenë një farsë e vërtetë. Tenderi 800 mijë lekë ka çuar në burg ish-sekretaren e kësaj ministrie si dhe pronarët e firmës.

Por, kjo sekretare ka kaluar “në duar” miliona euro tendera, ka firmosur dhënien e koncesioneve të famshme të Shëndetësisë, ka akorduar një “mal me para” për rikonstruksione. Pra, ka pasur një “dorë të lirë” nga ish-ministrja Manastirliu, e cilae  ka lënë Shëndetësinë për të “ndritur” te Arsimi.

Megjithatë, ajo çka ka lënë pas është një gropë e madhe në buxhet. Por, çfarë bëjnë institucionet institucionet ligjzbatuese dhe ato kontrolluese?! Merren me “cironka”, me tenderat e vegjël ku harxhojnë kohë dhe mund me hetime penale dhe administrative. Dhe, nëse do të bësh një llogari të thjeshtë rezulton se më shumë ka kushtuar letra dhe CD-të e përgjimeve sesa vetë vlera e tenderit!

Disa muaj më parë, SPAK-u arrestoi znj. Joana Duro, e akuzuar pasi ka marrë një ryshfet për një tender për supervizim punimesh në disa qendra shëndetësore. “Pas kryerjes së disa veprimeve hetimore, u krijuan dyshime se shtetësia Joana Duro, me detyrë Sekretare e Përgjithshme e Ministrisë së Shëndetësisë e Mbrojtjes Sociale ka marrë një përfitim të parregullt në shumën prej 330.000 (treqind e tridhjetë mijë) lekë, për të favorizuar një Operator Ekonomik”, thuhej në njoftimin e Prokurorisë së Posaçme. Mësohet se tenderi për të cilin bëhet fjalë është me vlerë 800 mijë lekë. Firma fituese është “DRICONS”, në pronësi të z.Vladimir Topi, i cili dha ofertën prej 600 mijë lekë të reja. Ndërkohë që më shumë se gjysma e kësaj vlere, pra 330 mijë lekë, u dha ryshfet!

Megjithatë, duket se orkestrimi ishte nga vetë kryeministri Rama, i cili nuk ngurroi të jepte edhe një opinion, kur në fakt për çështje të tilla deklaron gjithmonë se “s’kam koment”.

“Një Sekretare e Përgjithshme kapet në flagrancë duke marrë lekë. Si mund të ndodhë kjo? Ana e pëlqyeshme e kësaj medalje është që kapet një person që është i padenjë për të qëndruar në një zyrë shteti”, tha ai. Vërtet s’ka pasur dijeni kryeministri? As z. Ëngjëll Agaçi, Sekretari i Përgjithshëm i Këshillit të Ministrave? Ai që kontrollon të gjithë sekretarët në ministri dhe drejtori të rëndësishme.

Farsa e gjithë kësaj çështje, ku Joana mund të kapej me çfarëdo tenderi tjetër gjigant, është edhe vendimi për të përjashtuar firmën që dha ryshfet se gjysma e vlerës së procedurës. Në Agjencinë e Prokurimit Publik është dhënë një njoftim i shkurtër. “Operatori ekonomik i regjistruar në Qendrën Kombëtare të Regjistrimit me emër ‘Dricons’ shpk, përjashtohet – 7 (shtatë) muaj, duke filluar nga data 10.10.2023-10.05.2024” thuhet në këtë njoftim.

Pra përjashtimi ka nisur që nga muaji tetor 2023 dhe do të përfundojë në muajin maj, teksa në tetor ende s’ka një dënim përfundimtar për këtë firmë. Por, vetëm një akt-akuzë nga kryeministri Edi Rama që kësaj herë bën prokurorin. Me atë deklaratë ai ka ngritur akuzën, ka dhënë pretencën si dhe vendimin përfundimtar. A ka institucion ligj zbatues apo kontrollues që mund t’i dalin kundër? Natyrisht që jo, pasi të gjithë janë në “rresht”. Fjala e tij është dokument që zbatohet deri në fund.