Ilir Meta, kreu i Partisë së Lirisë, e ka konsideruar katër herë “akt terrorist”, sulmin e ndërmarrë nga qeveria ndaj pronës së administratorit të grupit të mirënjohur mediatik, Irfan Hysenbelliu.

Ilir Meta tha në një konferencë shtypi se shembja e resortit të mirënjohur Prestige, është akt terrorist ndaj medias së lirë, ndaj lirisë së pronës, ndaj turizmit dhe ndaj shtetit ligjor.  

“Prestige resort” tha Meta, -  është një nga resortet më të promovuar, i cili gjithashtu është promovuar nga Edi Rama në mënyrë të përsëritur dhe keni dëgjuar një pseudo-argument qesharak pas reagimit të fortë qytete dhe politik se ishte “me leje, por me kusht” dhe ngaqë nuk ishin plotësuar kushtet, u prish kur ishin gati 500 turistë.

Akti terrorist i ditës së sotme drejtohet ndaj medias së lirë, grupit mediatik që nuk ka plotësuar vetëm një kusht: ndërrimin e politikës editorial që të bëhet një kopje e ERTV.

Është gjithashtu akt terrorist ndaj lirisë së pronës dhe sipërmarrjes në këtë vend, ku ato që nuk janë të lidhura me Edi Ramën dhe familjen e tij, vuajnë për të përballuar aktivitetin e tyre dhe mbijetuar vështirësive."

Meta shtoi se shembja është një akt terrorist që dëmton turizmin në kulmin e tij dhe po ashtu, godet edhe shtetin ligjor, pasi nuk merr parasysh vendimet shtetërore, lejet zyrtare, që janë dhënë për objektin: 

"Akti i sotëm ishte demonstrim total i shkatërrimit të shtetit ligjor, ku edhe vendimet që këta i kanë miratuar vetë, madje edhe projektet që i kanë ideuar vetë pikërisht atje, nuk kanë asnjë vlerë përballë çmendurisë skizofrenike të Edi Ramës në panik."