Presidenti Ilir Meta është angazhuar sot përpara përfaqësuesve të biznesit agro-ushqimor për të nxitur zhvillimin e këtij sektori jetik për vendin dhe t'i japë mbështetje të plotë për konkurrim në tregjet ndërkombëtare, produkteve “Made in Albania”.

Meta i dha vetë në Fb hollësi mbi takimin:

“Situata e rënduar në sektorin agro-ushqimor dhe përballja me bllokimin e pritshëm të tregjeve për shkak të agresionit ushtarak të Rusisë në Ukrainë, i dha tonin takimit shumë të frytshëm që pata sot me përfaqësues të agrobiznesit, prodhuesve dhe përpunuesve të ushqimit, si dhe të sindikatave të fushës së bujqësisë.

Dëgjova me shumë vëmendje shqetësimet e tyre për rritjen e kostove të prodhimit, uljen e konkurrencës dhe rrudhjen e prodhimit vendas, diskriminimin e tij të pashembullt krahasuar me importet.

U angazhova për të ndërmarrë së bashku të gjitha hapat e nevojshme, për të nxitur institucionet përgjegjëse shtetërore për nxitur ngritjen dhe zhvillimin e këtij sektori jetik për vendin, me synim mbështetjen e plotë të produkteve “Made in Albania” në funksion të rritjes së konkurueshmërisë së biznesit shqiptar sidomos në tregjet europiane dhe ndërkombëtare.”