Komisioni maraton i inceneratorëve duket se ka marrë tjetër rrjedhë në orët e vona të natës, ku me gjithë tensionet dhe debatet maratonë, nuk kanë munguar edhe momentet pikante mes kryetares së Komisionit Hetimor, Jorida Tabakut dhe zv/ kryeministrit Arben Ahmetaj.
Zv/kryeministri ishte thirrur për të dëshmuar për aferën 430 mln euro, por kur ora shënonte më shumë se 22:00, debati u ngatërrua duke u shfokusuar krejtësisht nga megavjedhja e shekullit.
Gjatë dhënies së dëshmisë së tij, Ahmetaj është ndërprerë në një moment nga kryetarja Tabaku e cila i është përgjigjur deklaratës së tij ngacmuese se ajo ‘është e lodhur pasi ka tërë ditën që shfryn uaaaa, po hëëë miii….’, duke kërkuar që të mos përdoren pasthirrma të tilla në mes të natës.
Kjo përgjigje patakt e zonjës Tabaku ka sjellë edhe të qeshura nga të pranishmit, ku mes tyre Ahmetaj i tregon se ‘pasthirrmat në mes të natës janë ku janë’.
Debati:
Ahmetaj i drejtohet Tabakut: Do të lutesha edhe për transparencë të më lejoje se dhe e lodhur je...
Tabaku: Unë jam shumë e qetë.
Ahmetaj: Po unë nuk të thashë që nuk je e qetë. Të thashë që je e lodhur. Ke gjithë ditën. Uaaaa, po hëëë miii…
Tabaku: Të lutem se këto pasthirrmat tani në mes të natës… të lutem!
(Plas e qeshura)
Ahmetaj: Pasthirrmat në mes nate janë ku janë…
Tabaku: Zoti Ahmetaj, respektoni këtë komision.
***
Gjatë dëshmisë, Ahmetaj nënvizoi 3 të pavërteta që sipas tij janë lakuar në këtë komision. Mes të tjerash Ahmetaj, shprehu gatishmërinë e tij se ishte i hapur që t’ju përgjigjen pyetjeve të komisionit deri në 6 të mëngjesit nëse do të ishte nevoja.
Ahmetaj: Sqaruam një të pavërtetë. E parë është se kishte dy vendime. Por ka një vendim. E thatë tani (I drejtohet Tabakut). E dyta; një e pavërtetë tjetër është se ‘Ministria e Financave se ka aprovuar’. Ministria e Financave ka dhënë dakordësi të plotë për financimin në fund të 2014-ës. Kjo ka qenë e pavërtetë se ka dalë në publik se; aty s’ka qenë e aprovuar nga MF-ja. Janë 184 kontrata të bëra në periudhën 2005-2013. Kam një kontratë këtu që është HEC-i i Ashtës.
Tabaku: Dua këtë çështje këtu!
Ahmetaj: Po do rri deri në 6 të mëngjesit, deri sa të doni ju. Do bëjmë debate të pafundme. Unë jam anëtar i qeverisë dhe ti anëtare e opozitës. Dua një shembull koncensioni.
Tabaku: Se dua. Unë dua që të vazhdojmë këtu
Ahmetaj: Do na vlejë, është çështje interesante.
Tabaku: S’ka interes me këtë komision
Ahmetaj: Ka shumë. Shikoni pak koncensionin e Ashtës, ka marrë 77 mln euro nga buxheti i Shtetit. Po ky HEC pse ka marrë? Se ka punuar. Po pastrimi i Elbasanit, i Fierit? I Tiranës? A kanë punuar? Po! Është koncension tipik, ndaj e solla për t’iu paraprirë dhe unë. Ne do e bëjmë debatin për Shqipërinë. Këtu doli që edhe në momentin që një muaj para se të ikte, ish-ministri ka dhënë një ‘ok’ për bunsin e Fierit. E pavërteta e tretë; ‘430 mln euro’.
Tabaku: Dua të fokusohem në lidhje me procedurën e inveneratorit të Tiranës. Ju thoni se sipas kompetencave që ju jep ligji, keni qenë ministër i Financave në atë periudhë kur u miratua kontrata koncensionare dhe keni dhënë mendim për këtë kontratë. Cili është mendimi juaj për këtë kontratë?
Ahmetaj: Siç u diskutua edhe këtu, dhe më vjen mirë që u artikulua partë se MF është autoritet fiskal dhe jo kontraktor. Sa i përket koncesioni të Tiranës, ai ka disa pika dhe letërkëmbime që i keni. Ato i referohen kërkesave kontraktore, duke iu referuar zbatimit normal të fizibilitetit, që është neni 19 dhe neni 42 te ligji i PPP-ve, ku thuhet se Ministria e Financave i referohet qëndrueshmërisë fiskale. Çdo të thotë kjo? Sa e mban në atë vit të paracaktuar në bazë të PPA-së në raport me borxhin dhe në këtë kufizim që unë e kam nisur si Ministër, ku i vura dhe më ka mbështetur qeveria dhe parlamente, 5% të të ardhurave tatimore vitit paraardhës.
© SYRI.net