Kina nisi sot një anije kozmike pa pilot, e krijuar për t’u ulur në sipërfaqen e Hënës, duke synuar të bëhet vendi i parë që mbledh mostra shkëmbi nga ana e largët kryesisht e paeksploruar e Hënës.

Anija kozmike “Chang’e 6”, e cila ka marrë emrin e perëndeshës kineze, u ngrit nga qendra hapësinore Wenchang në ishullin jugor kinez të Hainan.

Ky është misioni i gjashtë hënor i nisur nga Kina që nga viti 2007.

Në vitin 2019, “Chang’e 4” u bë anija e parë kozmike që u ul në anën e largët të Hënës, hemisferën hënore e cila gjithmonë shikon larg Tokës.

“Chang’e 5”, ndërkohë, mblodhi mostra nga ana e afërt e Hënës në vitin 2020.

Misioni i ri pritet të zgjasë 53 ditë dhe është vendosur të mbledhë mostra nga pellgu i Polit të Jugut-Aitken, një krater i madh.

Kina tha se dëshiron të dërgojë ekuipazh në një mision hënor deri në vitin 2030.

Hëna është bërë qendra e interesit për shumë kombe gjatë viteve të fundit për shkak të lëndëve të para të vlefshme që besohet se ajo përmban.