Policia ka vënë në pranga 5 shtetas si dhe janë në procedim penal dy të tjerë, për shkak se kanë kërcënuar presidentin e Federatës Shqiptare të Futbollit, Armand Duka.

Sipas njoftimit të policisë, u bë arrestimi në flagrancë i shtetasve me iniciale R.L. 30 vjeç, P.S, 26 vjeç, B.S, 20 vjeç, S.S, 22 vjeç, dhe N.S, 57 vjeç, të gjithë banues në Krujë.

Si dhe u proceduan ne gjendje të lirë shtetasit A.S, 24 vjeç dhe A.S, 39 vjeç, të dy banues në Krujë.

Arrestimi dhe procedimi i tyre u bë pasi: Më datë 30.08.2024, rreth orës 21:30, kanë kërcënuar me anë të një mesazhi telefonik për shkak të detyrës shtetasin A.D, 62 vjeç, banues ne Durrës dhe më pas rreth orës 22:30, i kanë shkuar te banesa, me qëllim kërcënimin e tij.

Pas marrjes së njoftimit, shërbimet e Policisë organizuan punën, duke lokalizuar, kapur dhe shoqëruar në Komisariat personat e dyshuar.

Në përfundim të veprimeve të para hetimore u bë arrestimi në flagrancë i pesë shtetasve dhe procedimi në gjendje të lirë i dy të tjerëve.

Materialet i kaluan Prokurorisë Pranë Gjykatës Shkallës Parë të Juridiksionit të Përgjithshëm Durrës për veprën penale “Kanosja për shkak të detyrës” e kryer në bashkëpunim.

Emrat e plotë janë

Presidenti i Ilirisë së Fushë-Krujës dhe tre djemtë e tij futbollistë:

Nazmi Selmani (Presidenti i Ilirisë së Fushë-Krujës)

Adolf Selmani (mbrojtësi i Ilirisë)

Brajan Selmani (mbrojtësi i Ilirisë)

Santiago Selmani (sulmuesi i Ilirisë)