Gjykata e Posaçme ka lënë në burg Leonard Dukën, i cili pak ditë më parë u ekstradua në vendin tonë nga Belgjika për llogari të SPAK.

Prokuroria e Posaçme e kërkon Dukën pasi gjykata i kishte caktuar në mungesë masën e sigurisë arrest në burg për veprat penale të “Vrasjes me dashje e kryer ne bashkëpunim”, “armëmbajtje pa leje”, “sigurim i kushteve për vrasje” dhe “grup i strukturuar kriminal”.

Nga hetimet është provuar se Leonard Duka në bashkëpunim me 6 persona të tjerë janë autorë të dyshuar të vrasjes së Santiago Malkos, ngjarje e ndodhur në vitin 2019 në rrugën “Xhamfize Keko” në Tiranë.

Malko njihej si krahu i djathtë i Ervis Martinajt, i zhdukur pa gjurmë prej afro 2 vitesh tashmë, e ndërsa sulmi me armë ndaj tij ka ardhur për shkak të përplasjeve të vazhdueshme që grupi i Martinajt kishte me grupin Duka.

Një tjetër ngjarje ku Leonard Duka rezulton i përfshirë është edhe ajo e vrasjes së anëtarit tjetër të grupit “Martinaj”, Erigres Mihasi.

Prokuroria thotë se Duka ka planifikuar sulmin ku viktimë mbeti edhe Armand Dumani, ngjarje e  ndodhur më 13 nëntor 2021.

Nga operacioni “Revansh”, SPAK thotë se Leonard Duka se bashku me vëllain e tij Erlis akuzohen për sigurim kushtesh për të vrarë Ervis Martinajn, person ky prej të paktën 2 vitesh rezulton i zhdukur.