SPAK u ka komunikuar akuzat për shpërdorim detyre 11 ish-zyrtarëve të përfshirë në aferën e inceneratorit të Tiranës. Ata akuzohen për shpërdorim detyre, ndërsa për Alqi Bllakon thonë burime, kanë dalë fakte të tjera për korrupsion. Akuza për shpërdorim detyre u bë në kushtet kur për këtë vepër penale, janë drejt fundit afatet e paraburgimit.
SYRI TV
Prokuroria e Posaçme u ka komunikuar akuzat 11 personave nën hetim për inceneratorin e Tiranës lidhur me masat e para që janë caktuar për këtë dosje në dhjetor të vitit të kaluar. Burime bëjnë me dije se akuzat janë komunikuar për shpërdorim detyre kryer në bashkëpunim. Hetimet kanë përfunduar vetëm për personat që kanë marrë pjesë në procedurat deri në lidhjen e kontratës koncesionare, dhe kumunikimi i auzave është bërë për shkak se ndodhen drejt përfundimit afatet hetimore për veprën penale për të cilën akuzohen.
Ndërkohë ish-sekretarit të Përgjithshëm të Ministrisë së Mjedisit Alqi Bllako, ende nuk i është bërë komunikimi i akuzës, për shkak se janë zbuluar gjatë hetimit fakte të reja që krijojnë dyshimin për korrupsion. Një pjesë e tyre u arrestuan në datën 8 dhjetor të vitit 2023, ndërkohë që disa të tjerë patën masa më të buta sigurie. Në kërkim u shpallën Klodian Zoto, Mirel Mërtiri dhe Erjon Murataj. Akuzat fillestare ishin për korrupsion, mashtrim, pastrim të parave dhe shpërdorim detyre.
SPAK hetoi kontratën e koncesionit të 31 gushtit të vitit 2017 e lidhur midis Ministrisë së Mjedisit, që në atë kohë drejtohej nga Lefter Koka, dhe shoqërisë “Integrated Energy B.V SPV”, në përbërje të së cilës është aksionere edhe shoqëria Integrated Technology Services” në pronësi të Klodian Zotos, por që sipas SPAK pas koncesionarit qëndrojnë të njëjtë persona Zoto e Mërtiri. Këta të fundit përdorën persona dhe shoqëri të tjera për të fshehur gjurmët si pronarët e vërtetë të djegësit. Prokuroria thotë se ata përfituan përmes faturave tatimore të falsifikuara, qindramijëra euro ndërsa 7 anëtarët e komisionit të dhënies se koncesionit i kanë favorizuar.
Kujtojmë se së fundmi për të njëjtën çështje u lëshuan 8 urdhër arreste por asnjëri prej tyre nuk u ekzekutua, ndërsa një nga veprat penale që u akuzuan ishte ajo e grupit të strukturuar kriminal.
© SYRI.net