Vrasja e 22-vjeçares keniane mbetet ende e pazgjidhur, teksa kanë kaluar 2 muaj nga vdekja e saj në Kenia për shkak të dhunimit barbar në Tiranë, në banesën ku jetonte me qira.

E gjithë ngjarja është zhvilluar nga ora 03:30 minuta deri në orën 06:30 kur në banesë mbërriti shoqja e dhomës së Joy Ayoko, Emili Mutua.

Çfarë roli ka Emili në këtë histori, shoqja e dhomës së Joy, e cila u kthye nga puna mëngjesin e 13 gushtit dhe nuk e gjeti 22-vjeçaren në banesë?

Përse më pas ajo i kërkoi shoqes së ngushtë të Joyt passwordet e dy telefonave të saj?

Joy Brenda shoqja e 22-vjeçares konfirmon faktin se Emili i ka marrë passwordet e telefonave te Joyt.

“Është e vërtetë që Emili më ka telefonuar dhe më ka kërkuar passwordin e telefonave të Xhoit. Më telefonoi e më tha se pranë saj ishte policia dhe se kërkonin të dinin passwordet e Xhoit, sigurisht nëse i kisha. Ne përdornim të njëjtin password me Xhoin dhe ia dhashë policisë, në mënyrë që të ndihmoja në hetim sepse bisedat janë në telefon dhe policia mund të shikojë çdo person me të cilin bisedonte Xhoi. Kështu që isha e vetëdijshme që do të ndihmoja në hetimin e ngjarjes. Nuk më kujtohet data e saktë apo dita që ma kërkuan paswordin sepse ka kaluar pothuajse një vit, por Emili më tha që ishte me policinë dhe se policia po kërkonte fjalëkalimin e telefonit. Pasi dhashë kodin, nuk kam biseduar më me Emilinë në lidhje me ngjarjen. Nuk e kam pyetur kurrë Emilinë në lidhje me këtë ose nëse di diçka. Ne nuk kemi folur kurrë për Xhoin”, ka deklaruar Joy Brenda, shoqja e 21-vjeçares Joy Ayoko që u vra.

Pyetja që lind është çfarë kërkonte të shihte Emili në telefonat e Joyt apo çfarë donte të fshinte nga dy telefonat?

A është e vërtetë që Emili i kërkoi passwordet e telefonave të Xhoit në prani të policisë në orën 1 të natës së 15 gushtit kur bëri edhe denoncimin për zhdukjen e shoqes së saj të dhomës?

Përse policia duhet t’i kërkonte Emilisë të telefononte Joy Brendën për të marrë kodin e telefonave të Joyt, kur kjo është një procedurë që policia mund ta bënte vetë?

News24 ka informacione se Emili i ka kërkuar Joy Brendës passwordet e telefonave te Joy Ayokos para se të shkonte në polici dhe të bënte kallëzim, madje mund të tregojmë edhe passwordin me të cilin u hap telefoni i Joyt, ai ishte 14 78 52.

Pra, vetë shoqja e 22-vjeçares, Joy Brenda vërtetoi se Emili i mori kodet e telefonave të kenianes.

Por edhe nëna e Joy, Ruth Abongo më parë shpjegoi se si veproi Emili, duke hedhur dyshime të forta si bashkëpunëtore në fshehjen e provave të ngjarjes.