I riu nga Cërriku, Erion Rexhepi, që humbi jetën pas shpërthimit të tritolit në dorë, është viktimë e pafajshme e atentatit që u nis për t`iu bërë Mikel Harizajt. Makinës që përdorte Harizaj iu vendos tritol në 30 dhjetor të vitit të kaluar, por lënda plasëse ra gjatë kohës që makina ishte në ecje në Cerrik. Ndërkohë, pak ditë më parë, Hraizajt iu bë atentati i dytë me tritol, nga i cili mbeti i plagosur së bashku me një punonjës të biznesit të tij.

Nga SYRI TV

Erion Rexhepi, 27-vjeçari që u vra pas shpërthimit të bombës më datë 30 dhjetor në Cerrik, duket të jetë viktima fatkeqe e një atentati të mirëoganizuar ndaj Mikel Harizajt.

Ekzekutuesit e porosisë dështuan në tentativën e parë për të hedhur në erë Harizajn, por e provuan shansin sërish pak ditë më vonë duke mundësuar shpërthimin, i cili la të plagosur rëndë objektivin e atentatit, Mikel Harizajn, si edhe Serin Dunin.

SYRI TV ka zbardhur dy shpërthimet që tronditën vendin gjatë fundit të 2021 dhe fillimin e 2022, të cilat ndodhën pikërisht për të vrarë Mikel Harizajn. Vrasësit kishin ndjekur lëvizjet e Mikel Harizajt duke e parë se ai lëvizte me makinën tip ‘Mazda’, ngjyrë blu, e cila ishte në fakt në pronësi të vjehrrit të tij.

Burime bëjnë me dije se fillimisht ata kanë vendosur tritolin në makinën në fjalë me shpresën se do të përdorej nga Mikel Harizaj me qëllim që të kryenin shpërthimin kur ai të ishte në timon. Por, më datë 30 dhjetor 2021, makina u mor nga vjehrri i tij, i cili kaloi me automjetin në rrugën e lagjes ‘Kantier’ në Cerrik.

Në vendin ku ndodhi shpërthimi që vrau Rexhepin, është një pjesë e rrugës e ngritur me qëllim që makinat të ulin shpejtësinë. Policia dyshon se në atë vend lënda shpërthyese ka rënë nga makina, për shkak të tronditjes, për t’u gjetur pak minuta më vonë nga Erion Rexhepi, i cili do të humbiste jetën.

Burime bëjnë me dije për SYRI TV, se vjehrri i Rexhepit nuk ka kuptuar asgjë dhe me makinën ‘Mazda’, ngjyrë blu, është kthyer në Tiranë duke ia lënë në përdorim atë dhëndrit të tij. Pasi kanë parë që dështuan herën e parë, duke mos u mjaftuar edhe me viktimën rastësore, atentatorët kanë tentuar sërish ta vrasin Harizajn me të njëjtën makinë.

Makinës tip ‘Mazda’ i është vendosur sërish një sasi lënde shpërthyese. Kur kanë parë se në drejtim të saj tashë ishte Harizaj dhe jo vjehrri i tij, atentatorët nuk kanë marrë më në konsideratë që brenda ndodhej edhe Serin Duni, por e kanë shpërthyer tritolin me shpresën se kësaj radhe do t’ia arrinin qëllimit.

Mikel Harizaj dhe Serin Duni mbetën të plagosur rëndë nga shpërthimi, ndërsa porositësit tashmë kishin shkaktuar një viktimë dhe një të plagosur rëndë, pa ia arritur sërish qëllimit për të eliminuar objektivin e tyre.