Dy ditë më parë u publikua skandali në lidhje me aktivitetin e 13 kompanive të “Call Center-ave” në Tiranë, të cilat dyshohet se kanë mashtruar një numër të madh qytetarësh në BE, duke i premtuar se do të pasuroheshin nëse do të investonin në bursa.

Në një prononcim për mediat, një punonjës i këtyre call center-ave ka treguar me detaje se si arrijnë t’i ‘futnin në kurth” këta shtetas.

I riu quhet Enea, dhe tregon se emësoi gjermanishten me synimin për të emigruar, por pandemia ja vështirësoi procedurat ndaj ai nisi punë në një call center në Tiranë.

Pavarësisht pagës minimale, ai tregon se fitimi i tij katërfishohet në varësi të klientëve të huaj që i bind për të investuar në kriptomonedhë.

“Çdo mëngjes supervizori im më jep klientët që duhet të kontaktoj, bëhet fjalë për shtetas të huaj gjermanë. Ata regjistrohen nëpërmjet publiciteteve të ndryshme që shikojnë në internet, kryesisht në FB dhe Instagram”, u shpreh ai.

Çfarë u ofrohet qytetarëve në këto publicitete?

“U ofrohet një mundësi për të fituar lekë dhe për të ndryshuar të ardhmen e tyre. Muaji më me fat ka qenë muaji kur bitcoin ka pasur një lëvizje të madhe dhe klientët ishin pothuajse të bindur dhe arrita të bindja 15 klienta atë muaj”, u shpreh ai më tej.

Si shitet bitcoin, çfarë vlere ka?

“Bitcoin aktualisht kushton rreth 60 mijë dollarë, nëse ti investon dhe nesër shkon 70 mijë ti ke fituar”, u shpreh Enea.

Ndodh që fitojnë këta qytetarë?

“Ndodh që fitojnë por interesi i kompanisë është që ata të mos fitojnë”, tha ai.

Enea këmbëngul se punëdhënësit e garantuan që nuk po kryhen veprime të paligjshme, ndonëse është i bindur se shumë prej tyre janë mashtruar mbasi u është premtuar se do të fitojnë.

“Personalisht kryej 200-250 telefonata në ditë. 1 maksimumi 2 arrij ti bind. Në telefonatën time kryesisht investimi i parë shkon 250 euro”, tha ai më tej.