Gjykata e Krujës ka vendosur masën e sigurisë "arrest me burg" për Rexhep Rajën, djali i deputetit të Partisë Socialiste, Rrahman Raja, masë e cila është ekzekutuar nga policia. 

I riu akuzohet se ka dhunuar 25 vjeçaren Xhisiela Maloku, duke i djegur cigare në trup si dhe duke e goditur me qytën e pistoletës.

Kërkesa për caktimin e masës është dorëzuar dje në gjykatë nga prokuroria e Krujës, ndërsa gjykata e shqyrtoi sot (30 shtator) kërkesën, duke caktuar masën e sigurisë.

Shkak për dorëzimin e kërkesës në gjykatë është bërë një përgjim ambiental i djalit të deputetit

Prokuroria thotë se në përgjimin ambiental të bërë ditët e fundit, Rexhep Rraja flet për dhunën ndaj Xhisiela Malokut.

Arrestimi i tij vjen pas disa ditësh që kurse shpërtheu skandali i denoncuar në media nga oficeri i policisë Emiljano Nuhu, i cili aktualisht ndodhet jashtë vendit. Oficeri ka deklaruar se ishte kërcënuar në komisariatin e Policisë së Krujës për të mos hetuar djalin e deputetit, ndërsa atje kishte shkuar edhe kryetari i grupit parlamentar të Partisë Socialiste, Taulant Balla.

Nga ana tjetër, Mjekësia ligjore ka dorëzuar më 27 shtator në Prokurorinë e Krujës aktin e ekspertimit të Xhisiela Malokut duke vlerësuar se ajo ka dëmtime fizike të cilat klasifikohen si rrahje dhe për të cilat ligjërisht, jepet raport deri në 9 ditë.

Më konkretisht, e reja ka gërvishtje në shpatullën dhe në kofshën e djathtë, disa prej të cilave të shkaktuara edhe me mjete prerëse.

Ekspertimi është dorëzuar në organin e akuzës në Krujë për tu administruar në dosjen e procedimit penal të nisur ndaj shtetasit Rexhep Rraja, për akuzën e përndjekjes.

Kjo dosje mësohet se është hapur pas kallëzimit të bërë nga Xhisiela Maloku në datën 26 korrik 2018, pasi vajza ka pretenduar se është dërguar me forcë në hotel dhe është dhunuar nga Rexhep Rraja, me të cilin kishte një lidhje 10-vjeçare.

Veç këtij procedimi të nisur ndaj djalit të deputetit të PS Rrahman Rraja, mësohet se në prokurorinë e Krujës, është regjistruar edhe një dosje e dytë për këtë çështje, ndaj oficerit Gentian Çitozi për veprën penale shpërdorim detyre. Procedimi ndaj oficerit Çitozi është hapur pikërisht mbi bazën e pretendimeve të ngritura nga Xhisiela Maloku për tërheqjen e kallëzimit që kishte bërë për dhunë fizike ndaj saj.

Pas nisjes së hetimeve nga prokuroria për hetuesin Gentian Çitozi lidhur me pretendimet se nuk kishte evidentuar dhunën tek vajza dhe e kishte nxitur atë të tërhiqte denoncimin, dosja i kishte kaluar për veprime efektivit tjetër të policisë gjyqësore Emiljano Nuhu.

Burime nga prokuroria kanë thënë për Ora Neës se të dyja procedimet po vazhdojnë të hetohen, ndërkohë që vajza është marrë në pyetje disa herë, por në çdo rast, ajo nxjerr rrethana të reja që herë e lehtësojnë e herë e rëndojnë pozitën e deputetit të PS.

Nga ana tjetër, prokuroria ka sekuestruar edhe kamerat e hotelit ku vajza pretendon se është dërguar me forcë dhe është dhunuar nga shtetasi Rexhep Rraja.

Pas mbërritjes së ekspertizës në prokurorinë e Krujës, mësohet se grupi i hetimit ka vijuar kryerjen e veprimeve për zbardhjen e ngjarjes duke marrë në pyetje personat që kanë dijeni, si rrethin shoqëror të vajzës dhe familjarët e saj.

Mësohet gjithashtu  se Rexhep Rraja është është arrestuar sot paradite pranë një biznesi makinash me qira në Rinas. Në momentin e arrestimit, i riu nuk ka bërë rezistencë në momentet e arrestimit nga policia. Ai është dërguar në ambientet e drejtorisë së policisë Durrës.

Dhunimi i vajzës u bë publik pak ditë më parë, kur oficeri i policisë Emiljano Nuhu dëshmoi për dhunën e ushtruar ndaj vajzës së re dhe akuzoi policinë për neglizhencë si dhe tregoi se ishte kërcënuar me armë në prani të deputetit Taulant Balla.