Fansja e Harry Styles, e cila e shtyu admirimin e saj përtej një kufiri të shëndetshëm, do të duhet të kalojë kohë në burg, pasi është shpallur fajtore për ndjekjen e këngëtarit britanik, të cilit i dërgoi afro 8000 letra në vetëm një muaj.

Sipas gazetës britanike “The Sun”, fansja e fiksuar pas Styles është një grua braziliane e quajtur Myra Carvalho, 35 vjeçe, dhe ajo e çoi fanatizmin e saj në ekstrem, duke u zhvendosur në Kensington, një nga lagjet më ekskluzive të Londrës ku muzikanti jeton.

Në seancën dëgjimore, gruaja braziliane pranoi fajin e saj për një akuzë të ngacmimit deri në shkallën e shkaktimit të alarmit ose shqetësimit serioz.

Një gjykatë britanike i dha gruas një dënim me 14 javë burg dhe vendosi një urdhër ndalimi 10-vjeçar. Kjo përfshin ndalimin e pjesëmarrjes në çdo ngjarje që përfshin këngëtarin.

Ajo duhet të paguajë edhe një gjobë prej 166 dollarësh për dëmin e shkaktuar.