Pasi eliminoi Italinë me lojë bindëse në fazën e 1/8-ave, Zvicra “kërkon kokën” e Anglisë në fazën çerekfinale, teksa motivimi dhe besimi është maksimal te helvetët e udhëhequr në fushë nga kapiteni shqiptar Granit Xhaka.

Zviceranët janë padyshim surpriza më e bukur e këtij Europiani, teksa përballë do të gjejnë një Angli që ndonëse ka mbërritur në çerekfinale, është përballur me lumë kritikash për lojën e dobët dhe aspak bindëse.

Dy trajnerët kanë ndarë mendjen për formacionet që do të hedhin në fushë nga minuta e parë në Dusseldorf, aty ku në mbrëmje vetëm njëra mes Anglisë dhe Zvicrës, do të vijojë më tej rrugëtimin në Europian.