Në anën e kundërshtarëve të Kupës së Botës për Klube, gjërat kanë filluar të ngushtohen, ndërsa në anën tjetër, Infantino predikon, praktikisht i vetëm, gjërat mahnitëse të “ngjarjes më të madhe ndonjëherë”.

Sindikatat e lojtarëve të vendeve të ndryshme, të bashkuara nën flamurin e FifPro, paditën FIFA-n në mes të qershorit për kalendarin e mbushur me ndeshje, duke iu referuar veçanërisht Botërorit të ri për Klube (32 pjesëmarrës), të planifikuar në verën e vitit 2025.

“Kupa e Botës për Klube do të sjellë më shumë dëme sesa gjëra të mira, – tha numri një i AIC, Calcagno. – Futbollistëve iu kërkohet të mos bëjnë pushime dhe të luajnë pa stërvitje, çmenduri”.

Çështja mund të përfundojë direkt në Gjykatën Evropiane të Drejtësisë, ku Serie A, së bashku me ligat e tjera europiane synojnë të kundërshtojnë datat dhe metodat e turneut. Është një rebelim sistematik, një sulm i shumëanshëm, që duket se ka të ngjarë të përfshijë edhe federatat, të cilat janë gjithashtu skeptike. Ligat akuzojnë FIFA-n për “shpërdorim të një pozicioni dominues”, fjalë identike me ato të përdorura nga vetë Gjykata e BE-së në vendimin e 21 dhjetorit, që hapi dyert për Superligën.

“Rregullat e FIFA-s dhe UEFA-s, që i nënshtrojnë miratimit paraprak çdo projekt të ri, janë të paligjshme”, – tha gjyqtari i Unionit atë ditë, duke folur edhe për dëmet e shkaktuara te klubet dhe konsumatorët.

Në vazhdën e atij vendimi, Serie A, La Liga, Premier League dhe më gjerë shpresojnë të marrin një vendim të qartë edhe për Kupën e Botës, e cila u lëshua nga lart pa asnjë përfshirje të kampionateve që do të sugjeronin përfundimin e ngjarjes deri më 30 qershor, për të mos hyrë në sezonin 2025-2026. Kampionati botëror paraqet disa çështje për t’u zgjidhur më pak se një vit para fillimit.

Po cilat janë të gjitha dyshimet e Kupës së Botës për Klube? Para së gjithash, paratë. Çmimet nuk duket se i afrohen as bonusit prej 50 milionë eurosh të premtuar fillimisht nga FIFA. Dhe përsëri: nuk dihen ende sponsorizimet, të cilat duhet të përfaqësojnë burimin kryesor të të ardhurave, nuk dihen qytetet e SHBA që do të organizojnë ngjarjen, cilët transmetues do ta transmetojnë atë.