Trajneri i Belgjikës, Domenico Tedesco, thirri sot futbollistin e Atlético de Madrid, Axel Witsel, i cili kishte paralajmëruar tërheqjen nga kombëtarja, për të luajtur në “Euro 2024” në Gjermani, por jo portierin e Real Madridit, Thibaut Courtois.

“Nuk ka dyshim se ai është një lojtar me cilësi të lartë, i cili ka luajtur shumë minuta tek Atlético Madridi, – tha trajneri italo-gjerman në një konferencë për shtyp këtë të mërkurë në Tubize, në jug të Brukselit, ku shpalli listën me 25 lojtarë, e cila përfshin gjithashtu Kevin de Bruyne (Manchester City), Romelu Lukaku (Roma) dhe Jérémy Doku (Manchester City).

Gjithashtu në listë janë edhe ish-lojtari i Atlético Madridit, Yannick Carrasco, tani pjesë e Saudi Al-Shabab, dhe mesfushori bardhekuq, Arthur Vermeeren. Kthimi i Witsel në kombëtare ishte një sekret i shpallur.

Javën e kaluar, mediat belge treguan se Tedesco kishte udhëtuar drejt Madridit për ta bindur lojtarin 35-vjeçar dhe ai ishte treguar i gatshëm, pavarësisht se të dy nuk ishin dakord publikisht muajt e fundit për arsyet që çuan në largimin e mesfushorit, tani i kthyer.

“Unë u takova me të, doja të bisedoja duke e parë në sy, t’i shpjegoja situatën. Axel është një lojtar me përvojë, që gjithashtu mund t’i ndihmojë të rinjtë”, – shpjegoi trajneri i Belgjikës.

Interes krijoi edhe mundësia e largët e rikthimit të Courtois, i cili një vit më parë u zemërua me trajnerin e ri për atë që e kuptonte si mos respektim të hierarkisë së tij. Portieri braktisi grumbullimin e kombëtares dhe që atëherë tensioni nuk ka rënë, edhe pse dy dëmtime e kanë penguar të luajë pjesën më të madhe të sezonit me “Los Blancos”.

Megjithatë, dhe pavarësisht se ka mundësinë për të mbrojtur portën e Real Madridit në “Wembley”, në finalen e Ligës së Kampionëve kundër Borussia Dortmund, portieri belg nuk do të jetë me “Djajtë e Kuq” në Kampionatin Europian të kësaj vere. “Ishte i sinqertë, ishte i qartë. Ai e njeh trupin e tij (…) Informacioni i fundit që kemi është se ai nuk është gati për Europianin”, – nënvizoi trajneri.

Koen Castels (Wolfsburg) do të jetë portieri startues i Belgjikës në “Euro 2024”, ndërkohë që ky do të jetë kompeticioni i parë i Tedesco si trajner, i cili erdhi në stolin belg pas debaklit të Kupës së Botës në Katar, që iu dha fund gjashtë viteve të ekipit belg nën drejtimin e spanjollit Roberto Martínez.

Në anën e pasme, trajneri do të ketë referencë eksperiencën e 37-vjeçarit Jan Vertonghen, i cili më në fund është përfshirë në listë së bashku me mbrojtësit si Zeno Debast (Anderlecht), Thimoty Castagne (Fulham), Thomas Meunier (Trabzonspor), Amadou Onana (Everton), Maxim De Cuyper (Bruges) dhe Johan Bakayoko (PSV Eindhoven).

Europiani i Gjermanisë do të jetë edhe skena e rikthimit të “drejtorit të orkestrës” belge prej një dekade, Kevin de Bruyne. Ylli i Manchester City do të rikthehet në kombëtare pas gati një viti mungesë për shkak të dëmtimeve. Në moshën 32-vjeçare, ky mund të jetë kompeticioni i tij i fundit i madh me kombëtaren.

“Ne e njohim atë, nuk flet shumë, por mund të udhëheqë në shumë mënyra”, – komentoi trajneri. De Bruyne do të shoqërohet në mesfushë nga lojtarë si Charles de Kaetelere (Atalanta). Përpara, pesha sulmuese e Belgjikës do të vazhdojë të bjerë mbi Romelu Lukaku, i cili këtë sezon me fanellën e Romës ka shënuar 21 gola në të gjitha garat.

Belgjika, përveç Doku (Manchester City) do të ketë në sulm edhe Leandro Trossard (Arsenal) e Loïs Openda (Leipzig). Belgët do të debutojnë më 17 qershor kundër Sllovakisë, në një grup ku do të përballen edhe me Rumaninë dhe Ukrainën.

Lista e të ftuarve të Belgjikës për Euro 2024:

Portierë: Casteels, Kaminski, Sels.

Mbrojtës: Castagne, De Cuyper, Faes, Meunier, Theate, Jan Vertonghen, Debast.

Mesfushorë: De Bruyne, O.Mangala, Onana, Youri Tielemans, Vermeeren, Witsel, Vranckx.

Sulmues: Johan Bakayoko, Carrasco, De Ketelaere, Doku, Lukaku, Lukebakio, Openda, Trossard