Kroacia do të presë të mërkurën 12 shtete rajonale dhe presidentin ukrainas Volodymyr Zelensky, në udhëtimin e tij të fundit për të mbledhur mbështetjen e aleatëve

Samiti do të tregojë se “i gjithë rajoni mbështet Ukrainën dhe popullin ukrainas në luftën për liri”, deklaroi kryeministri kroat Andrej Plenkoviç.

Ai u zotua për “solidaritetin e vazhdueshëm të vendit të tij me Ukrainën… duke përfshirë mbështetjen ushtarake”.

Të pranishëm do të jenë krerët e shteteve, kryeministrat dhe ministrat e jashtëm nga Shqipëria, Kosova, Bosnjë dhe Hercegovina, Bullgaria, Greqia, Moldavia, Mali i Zi, Maqedonia e Veriut, Rumania, Serbia, Sllovenia dhe Turqia.

“Ne presim që rajoni të bashkohet në sinjalizimin e mbështetjes për Ukrainën”, pohoi të hënën kryediplomati kroat Gordan Grlic Radman.

Takimi në resortin jugor të Adriatikut të Dubrovnikut është samiti i tretë “Ukrainë-Evropa Juglindore”.

I fundit u mblodh në shkurt në Shqipëri, ku Zelensky bëri thirrje për mbështetje më të madhe për të ndihmuar në shmangien e forcave ruse.

Ai i ka bërë presion aleatëve të tij për më shumë ndihmë, me Rusinë që gëzon një avantazh të vijës së parë në fuqi punëtore dhe municione.

Zelensky ka kërkuar gjithashtu leje për përdorimin e armëve me rreze të gjatë të ofruara nga aleatët, përfshirë Shtetet e Bashkuara, për të goditur objektivat ushtarake thellë brenda Rusisë.

Samiti i së mërkurës vjen përpara një takimi tjetër ndërkombëtar për të diskutuar mbështetjen ushtarake për Ukrainën në Gjermani të shtunën.

Zelensky është planifikuar të marrë pjesë në atë mbledhje me më shumë se 50 aleatë të Ukrainës.

Ajo vjen në një moment vendimtar përpara zgjedhjeve në SHBA muajin e ardhshëm, të cilat mund të rrezikojnë miliarda dollarë mbështetje.

Kandidati republikan i SHBA-ve, Donald Trump, ka mbrojtur vazhdimisht presidentin rus Vladimir Putin dhe ka shprehur skepticizëm mbi financimin e SHBA-ve për Kievin.

Samiti i Ballkanit do të shënojë vizitën e parë të Zelensky-it në Kroaci.

Udhëheqësi ukrainas pritet të nënshkruajë një marrëveshje me Plenkoviç-in për mbështetjen dhe bashkëpunimin afatgjatë midis dy vendeve.

Ai do të fokusohet veçanërisht në përvojat e Kroacisë në ndjekjen penale të krimeve të luftës dhe heqjen e minave nga lufta e saj e pavarësisë e viteve 1990.

Takimi vjen mes një mosmarrëveshjeje të brendshme midis qeverisë konservatore të Kroacisë dhe presidentit Zoran Milanoviç për Ukrainën.

Milanoviç refuzoi në fillim të këtij muaji të mbështeste propozimin e qeverisë për të dërguar oficerë kroatë në një mision të NATO-s në Gjermani për të trajnuar ushtarët ukrainas.

Presidenti, i cili ka kompetenca të kufizuara, por është komandanti suprem i forcave të armatosura të vendit, theksoi se nuk do të lejojë ushtarët kroatë të “marrin pjesë në aktivitete që e shtyjnë Kroacinë në luftë”.

Kryeministri akuzoi Milanovicin se vepron kundër interesave kombëtare.

Ai u bëri thirrje ligjvënësve të anulojnë vendimin e presidentit, i cili do të kërkonte një shumicë prej dy të tretave të votave në parlament.