Komandanti i Forcave Quds të Iranit, Esmail Qaani, i cili udhëtoi për në Liban pas vrasjes muajin e kaluar të liderit të Hezbollahut, Hassan Nasrallah në një sulm ajror izraelit, nuk është dëgjuar që nga sulmet në Bejrut në fund të javës së kaluar, i thanë Reuters dy zyrtarë të lartë iranianë të sigurisë.

Një nga zyrtarët tha se Qaani ishte në periferitë jugore të Bejrutit, të njohura si Dahiyeh, gjatë një sulmi të enjten që u raportua se kishte në shënjestër zyrtarin e lartë të Hezbollahut, Hashem Safieddine, por zyrtari tha se ai nuk po takonte Safieddine.

Zyrtari tha se Irani dhe Hezbollahu nuk kanë qenë në gjendje të kontaktojnë me Qaanin që atëherë.

Izraeli ka goditur objektiva të shumta në Dahiyeh, ndërsa ndjek një fushatë kundër grupit libanez të mbështetur nga Irani, Hezbollahut.

Zyrtari i dytë tha gjithashtu se Qaani kishte udhëtuar në Liban pas vrasjes së Nasrallah dhe autoritetet iraniane nuk kishin qenë në gjendje ta kontaktonin atë, që nga sulmi kundër Safieddine, i cili pritej gjerësisht të ishte kreu i ardhshëm i Hezbollahut.

Hezbollahu nuk ka bërë asnjë koment deri më tani për Safieddine.

Forca Quds, krahu i jashtëm i Korpusit të Gardës Revolucionare Islamike të Iranit (IRGC), mbikëqyr marrëdhëniet me milicitë aleate me Teheranin në të gjithë Lindjen e Mesme, si Hezbollahu.

Komandanti i IRGC-së, gjeneral brigade Abbas Nilforoushan u vra me Nasrallah në bunkerin e tij, kur u godit më 27 shtator nga bombat izraelite./ Reuters.