Irani po kërkon të rifillojë negociatat për programin e tij bërthamor, tha të hënën Ministri i Jashtëm iranian Abbas Araghchi, duke shtuar se Teherani është i përgatitur të nisë diskutimet gjatë Asamblesë së Përgjithshme të Kombeve të Bashkuara në Nju Jork këtë javë, me kusht që "palët e tjera të jenë gati".

“Qëllimi ynë është të fillojmë një raund të ri negociatash bërthamore. Ne jemi të përgatitur dhe nëse palët e tjera janë gjithashtu, ne mund të rifillojmë diskutimet gjatë udhëtimit në Nju Jork,” citohet të ketë thënë Araghchi nga agjencia e lajmeve Fars, e lidhur me shtetin.

Araghchi, i cili aktualisht ndodhet në Nju Jork së bashku me Presidentin iranian Masoud Pezeshkian për Asamblenë e Përgjithshme, tha se ai do të qëndrojë në Nju Jork më shumë se Pezeshkian për të zhvilluar takime me diplomatë të ndryshëm të huaj.

Shtetet e Bashkuara, nën ish-presidentin Donald Trump, u tërhoqën nga marrëveshja bërthamore e vitit 2015 midis Iranit dhe gjashtë fuqive botërore në vitin 2018. Marrëveshja kishte vendosur kufizime në programin bërthamor të Iranit në këmbim të lehtësimit të sanksioneve.

Bisedimet indirekte midis Uashingtonit dhe Teheranit që synonin ringjalljen e marrëveshjes kanë ngecur. Ndërsa Irani mbetet pjesë e marrëveshjes, ai ka reduktuar angazhimet e tij në përgjigje të sanksioneve të SHBA.

Araghchi tha se janë shkëmbyer mesazhe me palët e tjera dhe se ka një "deklaratë të përgjithshme gatishmërie". Megjithatë, ai pranoi se faktorë të tillë si luftërat e vazhdueshme në Ukrainë dhe Gaza, e kanë bërë rifillimin e negociatave bërthamore "më të vështirë dhe të komplikuar se më parë".

Marrëdhëniet midis Iranit dhe Perëndimit janë përkeqësuar, veçanërisht për shkak të luftës së vazhdueshme midis Izraelit dhe grupit palestinez Hamas të mbështetur nga Teherani në Gaza, si dhe mbështetjes së Iranit për luftën e Rusisë në Ukrainë.

Irani shpreson për lehtësim nga sanksionet amerikane, të cilat kanë ndikuar rëndë ekonominë e tij.

Në korrik, pasi Pezeshkian u zgjodh president i Iranit, Uashingtoni tha se nuk ishte gati të rifillonte negociatat bërthamore me Teheranin.

"Ne do të shohim se çfarë dëshiron të bëjë ky djalë, por ne nuk presim ndonjë ndryshim në sjelljen iraniane," tha në atë kohë zëdhënësi i Sigurisë Kombëtare të Shtëpisë së Bardhë, John Kirby./ Al Arabiya.