Ish-presidenti Donald Trump kritikoi kohët e fundit zv/presidenten Kamala Harris për trajtimin e antisemitizmit prej saj i cili është në rritje në SHBA, duke e akuzuar se nuk ka bërë "absolutisht asgjë" për të luftuar këtë çështje. 

Gjatë një aktiviteti të "Të luftosh antisemitizmin në Amerikë" në Uashington, Trump i bëri thirrje Harrisit të "heqë dorë nga mbështetja e të gjithë simpatizantëve të Hamasit" dhe e denoncoi atë për shfaqjen e simpatisë ndaj protestuesve anti-izraelitë. Ai iu referua një interviste të korrikut ku Harrisi pranoi reagimin emocional të demonstruesve, megjithëse ajo hodhi poshtë disa nga mesazhet e tyre.

Trump i dënoi komentet e saj si të rrezikshme dhe të papërshtatshme për një kandidat presidencial, duke theksuar se Harrisi nuk ka arritur të denoncojë retorikën antisemite dhe anti-izraelite. Ai gjithashtu kritikoi qëndrimin e Harrisit për Gazën, sidomos mbështetjen e saj për kufizimin e dërgesave të armëve në Izrael, duke e akuzuar për përkëdhelje ndaj simpatizantëve të Hamasit brenda partisë së saj.

Veprimtaria u organizua nga Miriam Adelson, e cila lavdëroi Trump-in për rekordin e tij në Izrael, duke përfshirë zhvendosjen e Ambasadës së SHBA-së në Jerusalem, njohjen e Lartësive të Golanit si territor izraelit dhe ndërmjetësimin e Marrëveshjes së Abrahamit. Trump u ankua se pavarësisht politikave të tij pro-izraelite, hebrenjtë amerikanë vazhdojnë të votojnë për demokratët, duke argumentuar se ata e bëjnë këtë nga zakoni.

Trump u zotua se nëse rizgjidhet, do të ndërmarrë veprime agresive për të luftuar antisemitizmin në kampuset e kolegjeve dhe do të ndalojë zhvendosjen e refugjatëve nga Gaza. Ai paralajmëroi gjithashtu se Harrisi do të ishte "presidentja më anti-izraelite" nëse fitonte zgjedhjet, duke e akuzuar se është bërë palë me simpatizantët e Hamasit dhe se ajo kërcënon sigurinë e Izraelit dhe popullit hebre./New York Post - Syri.net