Qeveria e Venezuelës hodhi poshtë një rezolutë jodetyruese të miratuar nga Parlamenti Evropian të enjten për të njohur kandidatin e opozitës Edmundo González si president të Venezuelës. 

Asambleja Kombëtare e Venezuelës, e kontrolluar nga qeveria miratoi një marrëveshje për të "mohuar" vendimin e Parlamentit. 

Eurodeputetët e kishin njohur Edmundo González si "Presidentin legjitim dhe të zgjedhur në mënyrë demokratike të Venezuelës", me 309 vota pro, 201 kundër dhe 12 abstenime. 

Vendimi i tyre pasoi zgjedhjet e diskutueshme presidenciale brenda Venezuelës në korrik, të cilat opozita pretendon se i ka fituar. 

Megjithatë Këshilli Zgjedhor i vendit – i perceptuar si besnik ndaj qeverisë në detyrë – shpalli Nicolás Maduro fitues. 

Maduro iu referua vendimit të Parlamentit Evropian të enjten, duke bërë krahasime me mbështetjen e bllokut për ish-liderin e opozitës Juan Guaidò. 

Votimi në Parlamentin Evropian erdhi një ditë pasi González tha se ishte detyruar të nënshkruante një letër që pranonte humbjen e tij nga zyrtarët e qeverisë në mënyrë që të largohej nga vendi. 

Presidenti i Asamblesë Kombëtare, Jorge Rodríguez, e kishte zbuluar më herët letrën. 

Ardhja e Gonzalez në Spanjë ka acaruar marrëdhëniet mes Madridit dhe Karakasit.  

Javën e kaluar, Rodriguez bëri thirrje për prishjen e marrëdhënieve diplomatike dhe tregtare me Spanjën.