Kryetari i bashkisë së Nju Jorkut Eric Adams po përballet me një presion në rritje për të hequr ndihmësin e tij të ngushtë dhe mikun e tij të vjetër, Timothy Pearson, i cili po hetohet nga FBI-ja për korrupsion. Pearson, i cili shërbeu si komandant i Adamsit gjatë kohës së tyre në Policinë e Nju Jorkut, ka qenë prej kohësh këshilltar i besuar, por roli i tij në bashki është bërë gjithnjë e më i diskutueshëm.

Në fillim të këtij muaji, telefoni i Pearson-it u sekuestrua si pjesë e një hetimi federal që shqyrtonte nëse zyrtarët e qytetit, duke përfshirë vëllezërit e drejtorit të policisë së Nju Jorkut Edward Caban dhe zëvendëskryetarit të bashkisë për sigurinë publike Phil Banks, përfituan në mënyrë të pahijshme nga rolet e tyre qeveritare.

Pearson është përballur gjithashtu me akuza për sjellje të pahijshme, duke përfshirë vonimin e hapjes së një objekti emigrantësh për të siguruar një kontratë për një donator të fushatës së Adamsit. Për më tepër, kundër tij ka pasur padi të shumta që pretendojnë për ngacmim seksual dhe krijimin e një mjedisi armiqësor pune. Pearson i mohon këto akuza dhe bashkia ka ofruar mbështetje ligjore, duke shkaktuar kritika për trajtimin e veçantë.

Këshilltarët e Adamsit, duke përfshirë ish-kryekëshilltaren Lisa Zornberg, i kanë kërkuar kryebashkiakut të distancohet nga Pearson-i dhe ta shkarkojë atë. Zornberg dha dorëheqjen pasi Adams shpërfilli rekomandimin e saj. Një tjetër këshilltar kyç, komisioneri Caban, dha dorëheqjen me 12 shtator pasi Adamsi thuhet se i bëri presion për të dhënë dorëheqjen mes skandalit në rritje.

Roli i Pearson-it në administratën e Adamsit ka shkaktuar dhimbje koke të vazhdueshme për kryebashkiakun, pavarësisht besnikërisë së tij ndaj ish-kolegut të tij. New York Times zbuloi se Pearson-i kishte një pozicion në një kazino private ndërsa punonte për bashkinë, duke marrë një pagë të konsiderueshme nga të dy rolet. Ndonëse në fund ha dorëheqjen nga të dyja punët në kazino, ai vazhdoi të merrte një pagë bashkie dhe një pension policie përmes një agjencie qytetëse gjysmë të pavarur.

New York Post kohët e fundit i bëri thirrje Adamsit të pushonte Pearson-in, duke rritur presionin e publikut. Pavarësisht kësaj, Adams ka hezituar, me gjasë për shkak të lidhjes së tyre të thellë prej vitesh pasi kanë punuar bashkë në policinë e Nju Jorkut.

Megjithatë, ndërsa hetimet federale intensifikohen dhe pasojat politike rriten, Adams ka të ngjarë të jetë më shumë nën lupë për mbështetjen e tij të vazhdueshme për Pearson-in, duke e lënë administratën e tij në një udhëkryq. Nëse Adamsi do t'i dëgjojë këto thirrje ose do t'i qëndrojë besnik ndihmësit të tij në vështirësi, kjo mbetet për t'u parë./POLITICO /