Ish presidenti i Shteteve të Bashkuara Donald Trump, falënderoi Shërbimin Sekret dhe policinë lokale të dielën vonë, pas asaj që FBI tha se "duket të ishte një përpjekjeje për atentat" në klubin e tij të golfit në West Palm Beach të Floridës.

"Unë do të doja të falënderoja të gjithë për shqetësimet dhe urimet tuaja - sigurisht që ishte një ditë interesante!", tha zoti Trump në platformën e tij “Truth Social”. "Puna u krye në mënyrë të shkëlqyer".

Incidenti, në të cilin zoti Trump nuk u dëmtua, ndodhi dy muaj pasi u qëllua në vesh gjatë një veprimtarie të fushatës në Pensilvani.

Pjesëtarët e mbrojtjes së zotit Trump po siguronin zonat e fushës së golfit ku ai po po luante të dielën, kur panë një person të armatosur në shkurre. Agjentët e Shërbimit Sekret qëlluan në drejtim të të dyshuarit, i cili u largua nga zona dhe më pas u arrestua.

Sherifi vendas tha se i dyshuari la pas një "pushkë të stilit AK-47", një kamerë GoPro dhe dy çanta shpine.

"Agjenti i Shërbimit Sekret bëri një punë fantastike", tha Sherifi Ric Bradshaw i Zyrës së Qarkut Palm Beach, duke përshkruar punën e agjentit që pikasi “individin e armatosur” dhe qëlloi kundër tij.

Presidenti amerikan Joe Biden tha në një deklaratë mbrëmjen e së dielës se ishte lehtësuar që zoti Trump ishte i padëmtuar.

“Siç e kam thënë shumë herë, nuk ka vend për dhunë politike apo për çfarëdo dhune tjetër në vendin tonë dhe kam udhëzuar ekipin tim të vazhdojë të sigurojë që Shërbimi Sekret të ketë çdo burim, mundësi dhe masë mbrojtëse të nevojshme për të siguruar ish presidentin”, tha ai.

I have been briefed by my team regarding what federal law enforcement is investigating as a possible assassination attempt of former President Trump today.

A suspect is in custody, and I commend the work of the Secret Service and their law enforcement partners for their…

— President Biden (@POTUS) September 16, 2024

Nënpresidentja Kamala Harris, e cila kandidon kundër zotit Trump në zgjedhjet presidenciale të nëntorit, tha se ishte "thellësisht e shqetësuar nga përpjekjet e mundshme për atentat ndaj ish presidentit Trump".

"Siç tha Presidenti Biden, administrata jonë do të sigurojë që Shërbimi Sekret të ketë çdo burim, mundësi dhe masë mbrojtëse të nevojshme për të kryer misionin e tij thelbësor”, tha zonja Harris në një deklaratë.

Burime të ndryshme të mediave kombëtare amerikane, përfshirë Associated Press, The New York Times dhe Fox News Channel, cituan zyrtarë të paidentifikuar që e identifikuan të dyshuarin si Ryan Wesley Routh, 58 vjeç, nga Haëaii. Zyrtarët folën me kushtin që të mos u përmendet emri, sepse nuk ishin të autorizuar të diskutojnë hetimet në zhvillim.

Postimet në mediat sociale e shfaqin të dyshuarin Routh që mbështet fushatën zgjedhore të zotit Trump në vitin 2020, por në postimet më të fundit ai shfaqet në mbështetje të zotit Biden dhe zonjës Harris.

Ai gjithashtu shihet se ka diskutuar në mënyrë të përsëritur luftën në Ukrainë dhe dukej se përpiqej të rekrutonte ushtarë për të ndihmuar përpjekjet ushtarake të Ukrainës.

Presidenti ukrainas Volodymyr Zelensky, dënoi ngjarjen duke theksuar se dhuna politike nuk ka vend askund.

"Jam i lumtur të dëgjoj se zoti Donald Trump është i sigurt dhe i padëmtuar. Urimet e mia më të mira atij dhe familjes së tij", shkroi zoti Zelensky në rrjetin X.

I am glad to hear that @realDonaldTrump is safe and unharmed. My best wishes to him and his family. It’s good that the suspect in the assassination attempt was apprehended quickly. This is our principle: the rule of law is paramount and political violence has no place anywhere in…

— Volodymyr Zelenskyy / Володимир Зеленський (@ZelenskyyUa) September 16, 2024

Kremlini tha të hënën se lidhjet me Ukrainën të sulmuesit të dyshuar tregojnë se të "luash me zjarrin" ka pasoja.

I pyetur nga gazetarët zëdhënësi i Kremlinit Dmitry Peskov, tha se Moska po ndjek situatën e tensionuar në Shtetet e Bashkuara duke shtuar se Rusia nuk po ndërhynte në zgjedhjet presidenciale amerikane.

Zoti Trump nuk ka njoftuar ndonjë ndryshim në orarin e tij dhe do të flasë drejtpërdrejt në rrjetin X të hënën mbrëma nga prona e tij Mar-a-Lago.

Ndërkohë, drejtuesit e një grupi punues dypartiak të Kongresit që hetonte atentatin e 13 korrikut ndaj zotit Trump thanë se kanë kërkuar të informohen nga Shërbimi Sekret./VOA