Gjykata e Lartë e Brazilit tha të premten e 13 shtatorit se një gjykatës ka urdhëruar transferimin e rreth 3 milionë dollarëve nga kompanitë e Elon Musk-ut për të paguar gjobat e vëna mbi rrjetin e tij social X, i cili është pezulluar në vend.

Muajin e shkuar, gjykatësi Alexandre de Moraes urdhëroi mbylljen e X-it në Brazil pasi Musk refuzoi të hiqte dhjetëra llogari të krahut të djathtë dhe më pas nuk arriti të emëronte një përfaqësues të ri ligjor siç ishte urdhëruar.

Një deklaratë e shkurtër nga gjykata tha se Moraes "kishte vendosur një transferim prej 18.35 milionë realësh (3.28 milionë dollarë) në arkën e shtetit të bllokuara nga llogaritë" e X dhe firmës satelitore të internetit Starlink, të dyja në pronësi të Musk-ut. Moraes është përplasur vazhdimisht me miliarderin e lindur në Afrikën e Jugut, pasi e bëri misionin e tij të godiste dezinformimin.

Ai ngriu edhe asetet e X dhe Starlink, e cila ka operuar në Brazil që nga viti 2022 – sidomos në komunitetet e largëta në Amazonë - për të siguruar pagesën e gjobave të vendosura ndaj X-it për moszbatim të urdhrave të gjykatës. Platforma e rrjeteve sociale e njohur më parë si Twitter ka më shumë se 22 milionë përdorues në Brazil.

Moraes urdhëroi që ata që përdorin "manovra teknologjike" si rrjetet private virtuale (VPN) për të hyrë në faqen e bllokuar, mund të gjobiten deri në 9000 dollarë. Masat e tij kanë ndezur debatin për lirinë e shprehjes dhe kufijtë e rrjeteve sociale brenda dhe jashtë vendit.

Presidenti i majtë Luiz Inácio Lula da Silva përshëndeti ndalimin, ndërsa paraardhësi i tij i ekstremit të djathtë Jair Bolsonaro e quajti Moraesin "diktator". / Le Monde – Syri.net