Policia braziliane kreu një operacion të gjerë kundër minierave të paligjshme në Amazonë të hënën, duke bastisur një organizatë kriminale që financoi prodhimin dhe shitjen e 3.1 ton ar, origjina e të cilit ishte e fshehur me letra mashtruese.
Policia federale tha në një deklaratë se shumica e arrestimeve dhe dy duzina urdhëra kërkimi dhe sekuestrimi të dorëzuara ishin në jug të shtetit Para, ku minierat e paligjshme të arit janë rritur vitet e fundit në pyjet tropikale, pjesa më e madhe në tokën e mbrojtur të rezervave indigjene.
"Ne zbuluam se të paktën 3.14 ton ar të nxjerrë ilegalisht ishin pastruar, duke përdorur deklarata mashtruese për origjinën e xehes," thuhet në deklaratë.
Pjesa më e madhe e arit u rafinua në Sao Jose do Rio Preto, një qytet në veri të shtetit San Paulo që ka një industri të lulëzuar bizhuterish dhe ku ari i paligjshëm shkrihet në shufra me ar legal, duke e bërë të vështirë gjurmimin e metalit të paligjshëm.
"Ne duhet të përcaktojmë nëse ari ishte i paligjshëm dhe erdhi nga miniera e paautorizuar," tha kreu i operacionit, oficeri i policisë federale, Alexandre Manoel Goncalves për Reuters.
Një gjykatës federal urdhëroi konfiskimin dhe ngrirjen e 2.9 miliardë reais (514 milionë dollarë) në para dhe asete, duke përfshirë automjete, motoçikleta, bizhuteri dhe copëza ari, tha policia.
Katër kompani u pezulluan, gjashtë licenca minerare dhe katër leje për armëmbajtje u hoqën dhe katër zyrtarë të pushtetit vendor u urdhëruan të largoheshin nga detyra, tha policia.
Deklarata shtoi se indigjenët u gjetën të përfshirë në organizatën kriminale./ Reuters.
© SYRI.net