Kombet e Bashkuara kanë bërë thirrje për një "hetim të plotë" për vrasjen e një gruaje amerikano-turke në Bregun Perëndimor, të pushtuar nga Izraeli, gjatë një proteste të premten.

Aysenur Ezgi Eygi u vra pasi forcat izraelite hapën zjarr.

26-vjeçarja po merrte pjesë në një protestë javore kundër zgjerimit të vendbanimeve hebreje në qytetin Beita pranë Nablus.

Sipas raporteve të mediave lokale, zonja Eygi u qëllua nga trupat izraelite. Ushtria izraelite tha se "po shqyrtonte raportet se një shtetas i huaj u vra si rezultat i të shtënave në zonë".

Një dëshmitar okular i tha programit Neëshour të Shërbimit Botëror të BBC-së se kishte dëgjuar dy të shtëna në protestë.

Duke reaguar ndaj vrasjes, Stéphane Dujarric, zëdhënësi i sekretarit të përgjithshëm të OKB-së, tha: "Ne do të dëshironim të shohim një hetim të plotë të rrethanave dhe se njerëzit duhet të mbahen përgjegjës."

Civilët, shtoi ai, "duhet të mbrohen në çdo kohë".

SHBA bëri thirrje gjithashtu për një hetim mbi incidentin. Sean Savett, zëdhënës i Këshillit të Sigurisë Kombëtare të Shtëpisë së Bardhë, tha se Uashingtoni ishte "thellësisht i shqetësuar nga vdekja tragjike e një qytetari amerikan".

"Ne kemi kontaktuar me qeverinë e Izraelit për të kërkuar më shumë informacion dhe për të kërkuar një hetim mbi incidentin," tha zoti Savett.

Pamjet nga vendi i ngjarjes pak pas të shtënave tregojnë mjekët duke nxituar për të marrë zonjën Eygi në një ambulancë.

Aktivisti hebre-izraelit Jonathan Pollak, i cili ishte në protestë, tha për programin Neëshour të BBC Ëorld Service se kishte parë "ushtarë në çati duke gjuajtur".

Ai tha se kishte dëgjuar dy të shtëna të ndara, "me një distancë  një apo dy sekonda mes tyre".

"Dëgjova dikë që më thërriste emrin, duke thënë në anglisht, 'Na ndihmo. Ne kemi nevojë për ndihmë. Ne kemi nevojë për ndihmë." Unë vrapova drejt tyre”, tha ai.

Ai tha se më pas kishte parë zonjën Eygi "të shtrirë në tokë nën një pemë ulliri, dukej e gjakosur për vdekje nga koka e saj".

“E vendosa dorën pas shpinës së saj për të provuar të ndaloj gjakderdhjen”, tha ai. "Unë ngrita sytë, kishte një vijë të qartë të shikimit midis ushtarëve dhe vendit ku ishim. Ia mora pulsin dhe ishte shumë, shumë i dobët."

Ai shtoi se demonstrata e së premtes ishte hera e parë e zonjës Eygi që merrte pjesë në një protestë me Lëvizjen Ndërkombëtare të Solidaritetit, një grup pro-palestinez.

Shtetasja me nënshtetësi të dyfishtë u dërgua me urgjencë në një spital në Nablus dhe më vonë u shpall e vdekur.

Dr Fouad Nafaa, drejtuese e Spitalit Rafidia ku u shtrua zonja Eygi, konfirmoi se një shtetase amerikane në mesin e të 20-ave kishte vdekur nga një "e shtënë me armë në kokë".

Sekretari amerikan i Shtetit Antony Blinken shprehu keqardhjen për "humbjen tragjike", ndërsa presidenti turk Rexhep Tajip Erdogan e cilësoi veprimin izraelit "barbar".

Ministria e Jashtme e Turqisë tha se zonja Eygi ishte "vrarë nga ushtarët okupues izraelitë në qytetin e Nablusit".

Përpara se të udhëtonte në Lindjen e Mesme, zonja Eygi ishte diplomuar së fundmi në Universitetin e Uashingtonit në Seattle.

Presidentja e shkollës, Ana Mari Cauce, e përshkroi lajmin për vdekjen e saj si "të tmerrshëm", ndërsa shtoi se zonja Eygi kishte pasur një "ndikim pozitiv" te studentët e tjerë.

Zonja Eygi ka lindur në Antalia, siç raportojnë mediat turke.

Në një deklaratë, Forcat e Mbrojtjes të Izraelit (IDF) thanë: "Gjatë aktivitetit të forcave izraelite të sigurisë ngjitur me zonën e Beita, forcat iu përgjigjën me zjarr ndaj një nxitësi kryesor të aktivitetit të dhunshëm, i cili hodhi gurë mbi forcat dhe përbënte një kërcënim për ta. .

"IDF po shqyrton raportet se një shtetase e huaj u vra si rezultat i të shtënave në zonë. Detajet e incidentit dhe rrethanat në të cilat ajo u godit janë nën shqyrtim."

Në intervistën e tij me BBC, Jonathan Pollak u pyet në lidhje me deklaratën e IDF, ku ushtria izraelite tha se forcat e sigurisë ishin përgjigjur ndaj hedhjes së gurëve.

Z. Pollak tha se kishte pasur përleshje, por ai mendonte se ushtarët nuk ishin "nën asnjë kërcënim".

Nuk kishte pasur "asnjë gjuajtje gurësh" aty ku ishte ajo, tha ai.

Forcat izraelite u tërhoqën nga qyteti Jenin dhe kampi i tij i refugjatëve në Bregun Perëndimor të pushtuar të premten, pas një operacioni madhor nëntë-ditor atje.

Ministria palestineze e shëndetësisë thotë se të paktën 36 palestinezë u vranë - 21 nga provinca e Jeninit - në atë kohë. Shumica e të vdekurve janë marrë nga grupet e armatosura si anëtarë, por ministria thotë se mes të vrarëve ka edhe fëmijë.

Në 50 vitet e fundit, Izraeli ka ndërtuar vendbanime në Bregun Perëndimor dhe Jerusalemin Lindor, ku tani jetojnë më shumë se 700,000 hebrenj.

Vendbanimet konsiderohen të paligjshme sipas ligjit ndërkombëtar - ky është qëndrimi i Këshillit të Sigurimit të OKB-së dhe i qeverisë së Mbretërisë së Bashkuar, ndër të tjera - megjithëse Izraeli e kundërshton këtë.