Rreth 4,400 sportistë me paaftësi fizike do të shkojnë në Avenue des Champs-Elysées për"paradën e njerëzve" me koreografi të suedezit Alexander Ekman.

Pas një Olimpiadë të paharrueshme në Paris, emocionet vazhdojnë me Para-Olimpiadën që po afron.

Ceremonia e hapjes së Lojërave Para-Olimpike të Parisit 2024 do të mbahet të mërkurën më 28 gusht, ku do të festojnë mijëra para-atletë nga 184 delegacione botërore.

Ashtu si Olimpiada, ceremonia e hapjes së Lojërave Para-olimpike nuk do të mbahet në një stadium, por përkundrazi do të zhvillohet jashtë në sheshin Place de la Concorde, i cili u shndërrua në një "park urban" për Lojërat Olimpike me skateboarding, stil i lirë BMX, 3x3 basketboll dhe breakdancing.

“Nga Champs-Elysées në sheshin Place de la Concorde, mezi pres të krijoj këtë spektakël që do të transformojë zemrën e Parisit, me shfaqje që nuk janë parë kurrë më parë”, thotë Thomas Jolly, drejtori artistik i ceremonisë.

Ai shton: “Një spektakël që do të shfaqë sportistët paraolimpikë dhe vlerat që ata mishërojnë. Një spektakël që do të bashkojë spektatorët dhe audiencën televizive në mbarë botën rreth frymës unike të Lojërave Paralimpike.”

Këtë herë Jolly ka kërkuar ndihmën e koreografit suedez Alexander Ekman për të tronditur edhe një herë kodet ceremoniale. Ekman ka zgjedhur ta bëjë vallëzimin fokusin kryesor të performancës, me mbi 150 kërcimtarë, përfshirë profesionistë me aftësi të kufizuara.

Ekman ka ndarë vizionin e tij për ceremoninë, duke thënë "Qëllimi ynë është të krijojmë një ceremoni Paralimpike që është një festë me një përzierje mesazhesh të rëndësishme, duke shfaqur artin e kërcimit koreografik dhe muzikën e kompozuar rishtazi nga Victor Le Masne dhe të frymëzuar nga sporti. "

Koreografi fitoi famë për interpretimin e tij në vitin 2016 të Liqenit të Mjellmave të Pyotr Ilyich Tchaikovsky në Oslo, ku ai rikrijoi një liqen në skenë, duke e mbushur atë me 6000 litra ujë.