Aleatët e paralajmërojnë ish-presidentin se taktikat e tij prej "showman"-i mund t'i kushtojnë një mundësi për mandatin e dytë në Shtëpinë e Bardhë
Donald Trump mund të humbasë zgjedhjet nëse vazhdon të sillet si një "provokator" dhe një "showman", ka paralajmëruar një aleat i lartë republikan, mes thirrjeve që ish-presidenti duhet të "rinisë" fushatën e tij.
Lindsey Graham, një senator republikan që luan rregullisht golf me Trump-in, tha se ai duhet të përqendrohet në "debatin e politikës" me Kamala Harrisin, në vend që të merret me sulme personale. Fushata e Trump-it është nën presionin e disa prej mbrojtësve të saj më të vendosur për të bërë ndryshime të mëdha në 80 ditët e fundit të fushatës. 78-vjeçari është kritikuar se e ka quajtur zonjën Harris "budallaqe" dhe pretendon se ajo kishte përdorur përkatësinë e saj etnike si një mjet fushate.
"Presidenti Trump mund t'i fitojë këto zgjedhje. Politikat e tij janë të mira për Amerikën dhe nëse ka një debat politikash për president, ai fiton", tha Graham për NBC. "Donald Trump provokatori, "showman"-i, mund të mos i fitojë këto zgjedhje".
Ai shtoi: "Po kërkoj që Presidenti Trump në 80 ditët e fundit të përcaktojë se çfarë do të bëjë për vendin tonë, për të rregulluar kufijtë e thyer, për të ulur inflacionin".
Sondazhet e fundit kombëtare tregojnë se zonja Harris ka dalë para Trump-it me rreth dy pikë, duke përmbysur epërsinë që ai mbante ndaj Joe Biden-it para vendimit të presidentit për t'u larguar nga gara me 21 korrik.
Disa republikanë i kanë bërë thirrje kandidatit të tyre që të fokusohet më shumë te inflacioni, influencuesit e ekstremit të djathtë kanë thënë se ai duhet të jetë më agresiv ndaj emigracionit dhe krimit.
Laura Loomer, një gazetare e ekstremit të djathtë, tha se surrogatët "e dobët" po shkatërronin fushatën dhe paralajmëroi Trump-in "duhet të ndryshojë shpejt sepse nuk mund të flasim për zgjedhje të vjedhura për 4 vjet të tjera".
Candace Owens, një tjetër influencuese, tha se kishte shpërthyer një "luftë civile MAGA", duke i thënë Trump-it: "Nuk e di se kush po e drejton autobusin MAGA. Po e humbisni mbështetjen nga njerëzit që besuan në ju… ju keni nevojë për ata njerëz."
Këtë javë, delegatët demokratë do të takohen në Çikago për kuvendin kombëtar të partisë, ku do të dëgjojnë fjalimet nga zonja Harris, zoti Biden, Barack Obama dhe Bill Clinton.
Zonja Harris do të përballet me kundërshtimin nga deri në 100,000 protestues pro-palestinez, të cilët do të mbajnë demonstrata masive në qytet kundër mbështetjes së administratës Biden për Izraelin.
Policia ka thënë se ngjarja nuk do të jetë një përsëritje e kuvendit të partisë të vitit 1968, e cila u mbajt gjithashtu në Çikago dhe u prish nga protestuesit e Luftës së Vietnamit. Trump do të bëjë fushatë në Miçigan, Pensilvani dhe në Karolinën e Veriut gjatë kuvendit.
© SYRI.net