Shtytja e fundit e forcave ukrainase në territorin rus ka ngritur shqetësime për rekrutët që Kremlini ka nxjerrë në vijën e parë të konfliktit, pavarësisht premtimeve të Presidentit Vladimir Putin se rekrutët e rinj nuk do të përfshiheshin në luftime me Ukrainën.

Teksa Moska përpiqet të frenojë ofensivën ukrainase, familjet e ushtarëve të rinj nga Rusia po shprehin shqetësim të madh për sigurinë e të dashurve të tyre.

Siç raporton CNN, mesazhet që qarkullojnë ditët e fundit në kanalet ruse të Telegramit dhe mediat e tjera sociale zbulojnë se sa e papërgatitur ishte Moska për një sulm të tillë, duke përfshirë lënien e rekrutëve të trajnuar dobët për të mbrojtur kufirin.

“Kur sulmi me tanke në kufi filloi në orën 3 të mëngjesit, aty ishin vetëm rekrutët që mbronin”, thuhet në një mesazh të tillë të shpërndarë në Telegram nga një grua që tha se është nëna e një ushtari të rekrutuar në rajonin e Kurskut.

“Ata nuk panë asnjë ushtar, asnjë ushtar me kontratë, askënd fare. Djali më mori në telefon më vonë dhe më tha: ‘Mami jemi të shokuar’”, tha gruaja e quajtur Olga.

Çështja e vendosjes së rekrutëve është një çështje e ndjeshme në Rusi, pjesërisht për shkak të premtimeve të përsëritura të Putinit për të mos i dërguar ata në front, por edhe sepse nënat dhe gratë e ushtarëve kanë qenë tradicionalisht një zë i fuqishëm brenda vendit, ku tani shumë prej tyre po shprehin zemërim.

Uebsajti i pavarur rus i lajmeve, Verstka, publikoi një intervistë me Natalia Apel, gjyshen e një rekrutuesi rus që shërbeu në Kursk dhe tani është zhdukur.

Apel tha se nipi i saj, Vladislavi, ishte vendosur i paarmatosur në një fshat rreth 500 metra larg kufirit. “Çfarë mund të bënin fëmijët? U përballën me ushtarët ukrainas me një lopatë në dorë?”, citohet të ketë thënë ajo.

Ndërkohë një peticion që i kërkon Putinit të tërheqë rekrutët nga rajoni është shpërndarë në internet dhe dhjetëra mesazhe nga njerëz që pretendojnë se janë anëtarë të familjes së rekrutëve rusë të zhdukur në rajonin e Kurskut janë postuar në media të ndryshme sociale, duke përfshirë rrjetin rus VKontakte.

Fakti që Rusia mbështetej te rekrutët për të mbrojtur kufirin duket se ka favorizuar forcat ukrainase, të cilat ishin në gjendje të përparonin në territorin rus me një lehtësi të dukshme të martën e kaluar.

Komandanti ushtarak ukrainas Oleksandr Syrskyi tha se trupat ukrainase kishin avancuar 35 kilometra përmes mbrojtjes ruse që nga fillimi i pushtimit.

"Ne kemi vënë nën kontrollin tonë 1,150 kilometra katrorë territor dhe 82 vendbanime", i tha Syrskyi presidentit ukrainas Volodymyr Zelensky gjatë një takimi online të enjten.