Shërbimi Sekret Amerikan ka miratuar një plan të ri që kandidati republikan për president Donald Trump të vazhdojë mitingjet në natyrë pas një atentati në korrik, raportoi të enjten Washington Post.

Agjencia do të përdorë xham antiplumb për të mbrojtur Trumpin, si dhe masa të tjera teknike të sigurisë që nuk janë parashikuar normalisht për kandidatët presidencialë, citon Washington Post të ketë thënë një zyrtar i paidentifikuar i Shërbimit Sekret.

Ish-presidenti amerikan i mbijetoi një atentati më 13 korrik në një tubim në Butler, Pensilvani.

Siguria në atë tubim ka qenë nën vëzhgim, me të shtënat që kanë ngritur shqetësime serioze për mënyrën sesi i dyshuari ishte në gjendje të hynte në një çati aty pranë me një vijë të drejtpërdrejtë shikimi nga vendi ku Trump po fliste.

Shërbimi Sekret ka thënë se ishte "turp" për dështimin e sigurisë dhe shefi i tij dha dorëheqjen, si pasojë e atentatit.

Shërbimi Sekret nuk iu përgjigj menjëherë një kërkese për koment mbi raportin e Washington Post.

Një pjesëmarrës në tubim u vra nga të shtënat dhe dy të tjerë u plagosën. Zyrtarët e FBI-së nuk kanë identifikuar ende një motiv për sulmuesin e dyshuar, 20-vjeçarin Thomas Crooks, i cili u qëllua për vdekje nga një agjent i Shërbimit Sekret pasi hapi zjarr.

Pas sulmit, Shërbimi Sekret rekomandoi që Trump të shmangte ngjarje të mëdha në natyrë. Trump më pas tha se do të vazhdonte mitingjet në natyrë dhe se Shërbimi Sekret kishte "pajtuar të rrisë ndjeshëm operacionin e tyre" për ta mbrojtur atë./ Washington Post.